કેલિફોર્નિયા, તા.૯: કેલિફોર્નિયાના ગવર્નર ગેવિન ન્‍યુસમે દરિયાકાંઠાના વિસ્‍તારમાં લાગેલી ભીષણ આગને ધ્‍યાનમાં રાખીને કટોકટીની સ્‍થિતિ જાહેર કરી છે. પેસિફિક પેલિસેડ્‍સમાં ઘણી ઇમારતો નાશ પામી હતી અને આશરે ૩,૦૦૦ એકર (૧,૨૦૦ હેક્‍ટર) જમીન બળીને રાખ થઈ ગઈ હતી. આ કારણે ઘણા લોકોને પોતાના ઘર છોડવા પડયા છે. આમાં ફક્‍ત સામાન્‍ય લોકો જ નહીં પરંતુ સેલેબ્‍સ અને કલાકારો પણ સામેલ છે. તેમાં અભિનેતા બેન એફ્‌લેકનો પણ સમાવેશ થાય છે, જે હાલમાં પત્‍ની જેનિફર લોપેઝથી છૂટાછેડા લેવાને કારણે સમાચારમાં છે. કેલિફોર્નિયામાં જંગલોમાં લાગેલી આગથી બચવા માટે બેન એફ્‌લેકે લોસ એન્‍જલસના ઉચ્‍ચ કક્ષાના પેસિફિક પેલિસેડ્‍સ વિસ્‍તારમાં પોતાનું ભાડું ઘર છોડી દીધું છે અને તેની ભૂતપૂર્વ પત્‍ની જેનિફર ગાર્નરના ઘરે આશરો લીધો છે.

૫૨ વર્ષીય ગુડ વિલ હંટિંગ અભિનેતા એવા સેલિબ્રિટીઝની યાદીમાં જોડાયા છે જેમને લોસ એન્‍જલસમાં તેમના વિસ્‍તારમાં આગ લાગવાને કારણે ઘર ખાલી કરવાની ફરજ પડી છે. આગથી ઘરોમાં ભારે તબાહી મચી ગઈ છે અને ૧૦૦ માઇલ પ્રતિ કલાકની ઝડપે ફૂંકાતા પવનોને કારણે તે ફેલાઈ રહી છે. બેનને જેનિફરના ઘરે જતો જોવા મળ્‍યો, જેનો વીડિયો વાયરલ થઈ રહ્‍યો છે. સમાચાર અનુસાર, બેન એફ્‌લેકના ઘરની કિંમત $૨૦.૫ મિલિયન છે, જેની કિંમત ૧૭૬ કરોડ રૂપિયા હોવાનું કહેવાય છે.

આ ઉપરાંત અમેરિકન ગાયિકા મેન્‍ડી મૂરે પણ ઇન્‍સ્‍ટાગ્રામ પર એક વીડિયો શેર કર્યો છે, જેમાં ભીષણ આગ જોવા મળી રહી છે.