નવી દિલ્હી પેરા-તીરંદાજ અને પેરિસ પેરાલિમ્પિક્સ 2024ના સુવર્ણ ચંદ્રક વિજેતા હરવિંદર સિંહે મેજર ધ્યાનચંદ ખેલ રત્ન પુરસ્કારના નામાંકનમાં પેરાલિમ્પિયન માટે માન્યતાના અભાવની ખુલ્લેઆમ ટીકા કરી છે.

પેરિસમાં સિંઘે ફાઇનલમાં પોલેન્ડના લુકાઝ સિઝેકને 6-0ના પ્રભાવશાળી સ્કોર સાથે હરાવ્યો હતો. પેરાલિમ્પિક્સમાં ગોલ્ડ મેડલ જીતનાર તે પ્રથમ ભારતીય પેરા-તીરંદાજ બન્યો.

હરવિન્દરે પોતાની પોસ્ટમાં લખ્યું છે કે, 'રમતમાં ભેદભાવ' ટોક્યો 2020 પેરાલિમ્પિક સુવર્ણ ચંદ્રક વિજેતાઓને મેજર ધ્યાનચંદ ખેલ રત્ન પુરસ્કારથી સન્માનિત કરવામાં આવ્યા હતા, પરંતુ પેરિસ 2024 પેરાલિમ્પિક સુવર્ણ ચંદ્રક વિજેતાઓનું શું સમાન સ્પર્ધા, સમાન ગોલ્ડ, સમાન ગૌરવ, સમાન પુરસ્કારો કેમ નહીં?

સિંઘ, જેમણે પેરિસ પેરાલિમ્પિક્સમાં પુરૂષોના વ્યક્તિગત રિકર્વ ઓપન ગોલ્ડ મેડલ જીતીને ઇતિહાસ રચ્યો હતો, તેણે ઓલિમ્પિકની સરખામણીમાં પેરાલિમ્પિક સિદ્ધિઓના સન્માનમાં અસમાનતા અંગે નિરાશા વ્યક્ત કરી છે. તેણે એક્સ પર પોસ્ટ પણ કરી છે.

હરવિન્દર સિંહે જણાવ્યું હતું કે ટોક્યો 2020 પેરાલિમ્પિક્સમાં તમામ ગોલ્ડ મેડલ વિજેતાઓ, જેમાં અવની લેખા, સુમિત અંતિલ અને પ્રમોદ ભગતનો સમાવેશ થાય છે, તેમને 2021માં ખેલ રત્ન એનાયત કરવામાં આવ્યો હતો. જો કે, તેમની ઐતિહાસિક સિદ્ધિઓ હોવા છતાં, પેરિસ પેરાલિમ્પિયન્સને સમાન સ્તરની માન્યતા આપવામાં આવી નથી.

પેરિસ ઓલિમ્પિકમાં બે બ્રોન્ઝ મેડલ જીતનાર મનુ ભાકરને ખેલ રત્ન નોમિનેશનમાંથી બાકાત રાખવાને કારણે વિવાદ વધુ વધી ગયો છે. પેરિસ ઓલિમ્પિકમાં 2 મેડલ જીતીને ઈતિહાસ સર્જનાર નેશનલ સ્પોર્ટ્સ એવોર્ડ સિલેક્શન કમિટીએ તેની અવગણના કરી છે. જ્યારે બ્રોન્ઝ વિજેતા શૂટર સ્વપ્નિલ કુસલે-સરબજોત સિંહ અને કુસ્તીબાજ અમન સેહરાવતની અર્જુન એવોર્ડ માટે ભલામણ કરવામાં આવી છે.