નવી દિલ્હી: સુપ્રીમ કોર્ટે સરકારને કહ્યું કે તેણે માત્ર ગરીબ લોકોને મફત રાશન આપવા પર જ નહીં પરંતુ તેમને રોજગાર આપવા પર પણ કામ કરવું જોઈએ. સુપ્રીમ કોર્ટે કેન્દ્ર સરકારને પૂછ્યું કે શું માત્ર મફત રાશન આપવું પૂરતું છે? કોર્ટે પરપ્રાંતિય મજૂરો અને ગરીબો માટે રોજગારની તકો ઊભી કરવા પર ભાર મૂક્યો અને કહ્યું કે આ કાયમી ઉકેલ હોઈ શકે છે.

   9 ડિસેમ્બરે ખાદ્ય સુરક્ષા અધિનિયમ સંબંધિત કેસની સુનાવણી દરમિયાન સુપ્રીમ કોર્ટે કહ્યું કે કેટલા સમય સુધી મફત સુવિધાઓ આપી શકાય? સરકારે લોકોને આત્મનિર્ભર બનાવવાની દિશામાં પગલા ભરવા જોઈએ.

  સુપ્રીમ કોર્ટે સરકારને રોજગારીની તકો વધારવા અને કૌશલ્ય વિકાસ કાર્યક્રમો પર ધ્યાન આપવાનો નિર્દેશ આપ્યો હતો. માત્ર મફત રાશન આપીને ગરીબોની સમસ્યા હલ થઈ શકતી નથી. લોકો એક પ્લેટફોર્મ ઇચ્છે છે જ્યાં તેઓ તેમની ક્ષમતાઓનો ઉપયોગ વધુ સારું જીવન બનાવવા માટે કરી શકે.

    સુનાવણીમાં વરિષ્ઠ વકીલ પ્રશાંત ભૂષણે કહ્યું કે ઈ-શ્રમ પોર્ટલ પર નોંધાયેલા તમામ પ્રવાસી મજૂરોને મફત રાશન આપવું ફરજિયાત હોવું જોઈએ. ભૂષણે કોર્ટને કહ્યું કે લાખો મજૂરો, જેઓ તેમના ઘરથી દૂર રહે છે, તેમની પાસે રેશન કાર્ડ નથી. આવી સ્થિતિમાં, ઈ-શ્રમ પોર્ટલ પર નોંધણી કરાવવા પર તેમને મફત રાશન આપવાની જોગવાઈ જરૂરી છે

   કેન્દ્ર સરકારે કોર્ટને જણાવ્યું કે રાષ્ટ્રીય ખાદ્ય સુરક્ષા કાયદા હેઠળ 81 કરોડ લોકોને મફત રાશન આપવામાં આવી રહ્યું છે. જો કે, કોર્ટે તેને અસ્થાયી ઉકેલ ગણાવ્યો અને કહ્યું કે આ યોજના લાંબા ગાળે લોકોને આત્મનિર્ભર નહીં બનાવી શકે