બેંગ્‍લોર, તા.૧૦: દુનિયાના કોઈ પણ છેડે જવું હોય અને રસ્‍તો ખબર ન હોય તો ગૂગલ મૅપ્‍સ લઈ જાય છે. જોકે હમણાં-હમણાં ગૂગલ મૅપ્‍સ ભળતા જ રસ્‍તા બતાવે છે. હાલમાં એક પરિવારને કારમાં બિહારથી ગોવા જવું હતું. તેમણે ગૂગલ મૅપ્‍સનું નેવિગેશન ચાલુ રાખેલું, પણ તેઓ ગોવાને બદલે કર્ણાટકના જંગલમાં પહોંચી ગયા. કર્ણાટકના બેલગાવી જિલ્લામાં આવેલા ખાનાપુરના ગાઢ ભીમગઢ જંગલમાં તેઓ પહોંચી ગયા. ત્‍યાં નેટવર્ક કવરેજ પણ જતું રહ્‍યું હતું. બહાર નીકળવાનો કોઈ રસ્‍તો પણ ન મળ્‍યો. છેવટે તેમણે જંગલમાં જ રાત ગાળવી પડી. સવાર પડી ત્‍યારે નેટવર્કનું કવરેજ શોધવા માટે ૪ કિલોમીટર ચાલવું પડયું અને એ મળ્‍યું એટલે ઇમર્જન્‍સી હેલ્‍પલાઇન ૧૧૨નો સંપર્ક કર્યો અને સ્‍થાનિક પોલીસે ત્‍યાં આવીને તેમને જંગલમાંથી બહાર કાઢયા.