મહારાષ્ટ્રમાં કોની સરકાર બનશે તેનો નિર્ણય 23 નવેમ્બરે થશે. આ પહેલા તમામ પક્ષો પૂરજોશમાં કામ કરી રહ્યા છે. દરમિયાન, કેન્દ્રીય ગૃહ પ્રધાન અમિતભાઈ  શાહે બુધવારે પરભણી જિલ્લાના જીંતુરમાં રેલીને સંબોધિત કરતા કોંગ્રેસ પર આકરા પ્રહારો કર્યા હતા. અમિતભાઈ  શાહે કહ્યું કે, 'રાહુલ બાબા' નામનું પ્લેન, જે અગાઉ 20 વખત ક્રેશ થઈ ચૂક્યું છે, તે 20 નવેમ્બરે યોજાનારી મહારાષ્ટ્ર વિધાનસભાની ચૂંટણી દરમિયાન ફરીથી ક્રેશ થવા જઈ રહ્યું છે

   અમિતભાઈ  શાહે કહ્યું કે 'સોનિયાજીએ રાહુલ બાબા નામના પ્લેનને 20 વખત લેન્ડ કરવાનો પ્રયાસ કર્યો અને પ્લેન 20 વખત ક્રેશ થયું. હવે ફરીથી 21મી વખત પ્લેનને મહારાષ્ટ્રમાં લેન્ડ કરવાનો પ્રયાસ કરવામાં આવી રહ્યો છે, સોનિયાજી, તમારું 'રાહુલ પ્લેન' 21મી વખત ક્રેશ થવા જઈ રહ્યું છે.

રેલીને સંબોધતા અમિતભાઈ  શાહે કોંગ્રેસ પર અયોધ્યામાં રામ મંદિરના નિર્માણને વર્ષોથી જાણીજોઈને અટકાવવાનો આરોપ પણ લગાવ્યો હતો. તેમણે કહ્યું કે 'પીએમ નરેન્દ્રભાઈ  મોદીએ રામ મંદિર બનાવ્યું અને કાશી વિશ્વનાથ કોરિડોર પણ બનાવ્યું, જેને ઔરંગઝેબે તોડી પાડ્યું હતું. હવે તમે ગુજરાત આવવા તૈયાર થાવ, કારણ કે સોમનાથ મંદિર પણ સોનાનું બની રહ્યું છે.

ગૃહમંત્રીએ કહ્યું કે 'મેં વિદર્ભ, ઉત્તર મહારાષ્ટ્ર, પશ્ચિમ મહારાષ્ટ્ર, કોંકણ, મુંબઈ, મરાઠવાડા જેવા તમામ સ્થળોની મુલાકાત લીધી છે. શું તમે મહારાષ્ટ્ર વિધાનસભાનું પરિણામ જાણવા માંગો છો? તો મારી વાત સાંભળો, 23મી નવેમ્બરે મહારાષ્ટ્રમાંથી મહા વિકાસ આઘાડીનો સફાયો થવા જઈ રહ્યો છે. તેમણે કહ્યું કે 23 નવેમ્બરે અહીં મોદીજીના નેતૃત્વમાં મહાગઠબંધનની સરકાર બનશે.

   અમિતભાઈ  શાહે કહ્યું કે રાહુલ બાબાની પાર્ટી કોંગ્રેસ અને તેના સહયોગીઓએ કાશ્મીરમાં કલમ 370 પાછી લાવવાનો ઠરાવ પસાર કર્યો છે. રાહુલ બાબા, ધ્યાનથી સાંભળો, માત્ર તમે જ નહીં તમારી ચોથી પેઢી આવે તો પણ કલમ 370 પાછી નહીં લાવી શકે. અમિતભાઈ  શાહે કહ્યું કે શિવસેના (UBT)ના વડા ઉદ્ધવ ઠાકરે એ લોકો સાથે ગઠબંધન કરી રહ્યા છે જેમણે ઔરંગાબાદનું નામ બદલીને છત્રપતિ સંભાજીનગર કરવાનો વિરોધ કર્યો હતો