નવી દિલ્હી :આ દિવસોમાં ભારતમાં તહેવારોની મોસમ છે. એક પછી એક મોટા તહેવારોની ઉજવણી થઈ રહી છે. આખો દેશ થોડા દિવસોથી દિવાળીના રંગોમાં રંગાઈ ગયો છે. હવે છઠના મહાપર્વની ઉજવણીની તૈયારીઓ ચાલી રહી છે. ભારતના કેટલાક રાજ્યોમાં દિવાળી કરતાં છઠનો તહેવાર મોટા પાયે ઉજવવામાં આવે છે. આ તહેવાર પર જે લોકો તેમના ઘરથી દૂર હતા તેઓ તેમના ઘરે પાછા ફરે છે.

  ઘણા લોકો છઠના અવસર પર ટ્રેન દ્વારા તેમના ઘરે જવાની યોજના બનાવે છે. પરંતુ આ દિવસોમાં ટ્રેનોમાં બુકિંગ ફુલ થઈ રહ્યું છે. આ કારણોસર ઘણા લોકો ફ્લાઈટ દ્વારા પણ જવાનો વિકલ્પ લઈ રહ્યા છે. પરંતુ જો ફ્લાઇટની વાત કરીએ તો છઠ પર બિહાર જવા માટે ફ્લાઇટની ટિકિટનું ભાડું દુબઇની ટિકિટ કરતાં વધુ છે.

    ભારતમાં પશ્ચિમ ઉત્તર પ્રદેશ, બિહાર અને ઝારખંડમાં છઠનો તહેવાર સૌથી વધુ ઉજવવામાં આવે છે. છઠ પૂજાના અવસર પર, લોકો દેશના જુદા જુદા ભાગોમાંથી બિહાર અને ઝારખંડ જવા માટે અલગ-અલગ રીતે પ્રયાસ કરે છે. જ્યાં ટ્રેનોમાં સીટો ફુલ છે. તેથી લોકો ફ્લાઇટની ટિકિટ બુક કરાવે છે. પરંતુ ફ્લાઇટના ભાડા આકાશને આંબી રહ્યા છે. પટના અને દરભંગાની ફ્લાઈટનું ભાડું દુબઈ, મલેશિયા, બેંગકોક અને સિંગાપોરની ફ્લાઈટ ટિકિટના ભાડા જેટલું થઈ ગયું છે. 

  દિલ્હી, મુંબઈ, સુરત, અમદાવાદ, બેંગલુરુ અને હૈદરાબાદ જેવા મોટા શહેરોથી બિહાર જતી લગભગ તમામ ફ્લાઈટ્સના ભાડામાં નોંધપાત્ર વધારો થયો છે. આ બાબતે ટ્રાવેલ એજન્ટનું કહેવું છે કે સામાન્ય રીતે તહેવારોમાં દર વખતે હવાઈ મુસાફરીનું ભાડું વધી જાય છે. પરંતુ આ વખતે કેટલાક શહેરો માટે ભાડામાં નોંધપાત્ર વધારો થયો છે.