નવી દિલ્‍હીઃ  શેરબજારમાં ઘટાડો આજે પણ ચાલુ છે. આજે એટલે કે મંગળવાર, 5 નવેમ્બરે BSEનો 30 શેરોનો બેન્ચમાર્ક ઈન્ડેક્સ સેન્સેક્સ 240 પોઈન્ટના ઘટાડા સાથે 78542 ના સ્તરે ખુલ્યો. જ્યારે એનએસઈના 50 શેરોવાળા ઈન્ડેક્સ નિફ્ટી 50 એ 78 અંકોની નબળાઈ સાથે 23916 ના સ્તર પર આજના કારોબારની શરૂઆત કરી છે.
વૈશ્વિક બજારો આજે એટલે કે મંગળવાર 5મી નવેમ્બરની અશુભ શરૂઆત તરફ ઈશારો કરી રહ્યાં હતા. આ સપ્તાહના અંતમાં યુએસ ફેડરલ રિઝર્વની પોલિસી બેઠક પહેલા વૈશ્વિક બજારોમાં સાવચેતીના પગલે સ્થાનિક ઇક્વિટી બેન્ચમાર્ક સૂચકાંકો સેન્સેક્સ અને નિફ્ટી 50 આજે લાલ રંગમાં ખૂલ્યા હતા.
નોંધનિય છે કે, સોમવારે ભારતીય શેરબજારના બંને બેન્ચમાર્ક સૂચકાંકો સેન્સેક્સ-નિફ્ટીમાં 1 ટકાથી વધુનો ઘટાડો નોંધાયો હતો. સેન્સેક્સ 941.88 પોઈન્ટ અથવા 1.18 ટકાના ઘટાડા સાથે 78,782.24 પર બંધ રહ્યો હતો. જ્યારે, નિફ્ટી 50 309.00 પોઈન્ટ અથવા 1.27 ટકાના ઘટાડા સાથે 23,995.35 પર બંધ રહ્યો હતો.
યુએસ પ્રમુખપદની ચૂંટણી અને આ અઠવાડિયે યુએસ ફેડરલ રિઝર્વ તરફથી સંભવિત વ્યાજદરમાં કાપની અપેક્ષા વચ્ચે વોલ સ્ટ્રીટ પર નબળાઈને કારણે મંગળવારે એશિયન બજારો મિશ્ર રહ્યા હતા. જાપાનનો નિક્કી 225 0.68 ટકા વધ્યો હતો, જ્યારે ટોપિક્સ 0.33 ટકા વધ્યો હતો. દક્ષિણ કોરિયાનો કોસ્પી 0.67 ટકા ઘટ્યો, જ્યારે કોસ્ડેક 0.25 ટકા વધ્યો. હોંગકોંગના હેંગસેંગ ઈન્ડેક્સ ફ્યુચર્સે થોડી ઊંચી શરૂઆતનો સંકેત આપ્યો હતો.