કેનેડામાં થયેલ હિંદૂ મંદિર પરના હુમલાને લઈને અનેક લોકોની પ્રતિક્રિયા સામે આવી છે. કેનેડામાં જે હિંદૂ મંદિર પર ખાલિસ્તાનીઓ દ્વારા હુમલો કરવામાં આવ્યો તે ઘટનાને શંકરાચાર્ય સદાનંદ સરસ્વતીજીએ વખોડી કાઢી છે. શંકરાચાર્ય સદાનંદ સરસ્વતીજીએ કહ્યું કે, ‘મંદિર પર હુમલો કરી શું પ્રાપ્ત થશે? મંદિર પર હુમલો કરી કોઈ જાતિ ધર્મ કે સંપ્રદાયનો વિકાસ ન થાય. કોઈ ધર્મ બીજા ધર્મ પર હુમલાનો સંદેશ નથી આપતો, આ તેઓની અજ્ઞાનતા છે.

    શંકરાચાર્ય સદાનંદ સરસ્વતીજીએ કહ્યું કે, આ હુમલાથી કોઈની આસ્થા અને શ્રદ્ધા ન તૂટી શકે, માત્ર પથ્થર તોડવાથી કોઈની આસ્થા ન તૂટી શકે.’ ટૂંકમાં શંકરાચાર્ય સદાનંદ સરસ્વતીજીએ આ હુમલાની ઘટને સખ્ત શબ્દોમાં નિંદા કરી અને પોતાની પ્રતિક્રિયા આપી છે. ખાસ કરીને વાત કરવામાં આવે તો અનેક લોકો દ્વારા આ ઘટના અંગે વિરોધ કરવામાં આવ્યો છે. એટલું જ નહીં પરંતુ કેનેડાના સાંસદ દ્વારા પણ હુમલાની ઘટનાની નિંદા કરવામાં આવી છે.

વડાપ્રધાન મોદીએ એક્સ-પોસ્ટમાં કહ્યું કે, 'હું કેનેડામાં હિંદુ મંદિર પર ઈરાદાપૂર્વક કરવામાં આવેલા હુમલાની સખત નિંદા કરું છું. આપણા રાજદ્વારીઓને ડરાવવાના કાયર પ્રયાસો પણ એટલા જ ભયાનક છે. હિંસાના આવા કૃત્યો ભારતના સંકલ્પને ક્યારેય નબળો પાડી શકશે નહીં. અમે આશા રાખીએ છીએ કે કેનેડા સરકાર ન્યાયની ખાતરી કરશે અને કાયદાનું શાસન જાળવી રાખશે.’