આંધ્રપ્રદેશના મુખ્યમંત્રી અને તેલુગુ દેશમ પાર્ટીના વડા એન ચંદ્રબાબુ નાયડુએ દક્ષિણના રાજ્યોના લોકોને વધુ બાળકો પેદા કરવાની અપીલ કરી છે. આ માટે તેમણે રાજ્યમાં વૃદ્ધોની વધતી જતી વસ્તીનો પણ ઉલ્લેખ કર્યો. મુખ્યમંત્રીએ રાજ્યમાં ઘટી રહેલા પ્રજનન દર અને વૃદ્ધ વસ્તી અંગે ગંભીર ચિંતા વ્યક્ત કરી છે. ગયા શનિવારે, 19 ઓક્ટોબર, મુખ્યમંત્રીએ કહ્યું હતું કે રાજ્ય સરકાર વસ્તી વ્યવસ્થાપનનું આયોજન કરી રહી છે.

   ટીડીપી ચીફનું કહેવું છે કે આ માટે સરકાર એક બિલ લાવવા પર પણ વિચાર કરી રહી છે જેમાં વધુ બાળકો ધરાવતા પરિવારોને પ્રોત્સાહન આપવામાં આવશે. આ સાથે એક કાયદા પર પણ વિચાર કરવામાં આવી રહ્યો છે, જેના હેઠળ માત્ર એવા લોકો જ સ્થાનિક સંસ્થાઓની ચૂંટણી લડી શકશે જેમને બેથી વધુ બાળકો હશે.

     ચંદ્રાબાબુએ કહ્યું કે દક્ષિણના રાજ્યોમાં ઝડપથી ઘટી રહેલો પ્રજનન દર રાજ્ય માટે ખતરો છે. તેમણે કહ્યું કે દક્ષિણ ભારતનો પ્રજનન દર ઘટીને 1.6 થઈ ગયો છે, જે રાષ્ટ્રીય સરેરાશ 2.1 કરતા ઘણો ઓછો છે. આંધ્રપ્રદેશ અને દક્ષિણ ભારતના અન્ય રાજ્યોમાં આવા ઘણા ગામો છે જ્યાં માત્ર વૃદ્ધ લોકો જ બાકી છે. આ વિસ્તારોમાં યુવાનોની વસ્તી ઘટી રહી છે. તેમણે કહ્યું કે આનાથી રાજ્ય અને દેશ માટે ખતરો બની શકે છે. સીએમએ કહ્યું કે જો સ્થિતિ આવી જ રહેશે તો 2047 સુધીમાં વૃદ્ધોની વસ્તીમાં નોંધપાત્ર વધારો થશે.