ટોકયો, તા.૧૬: જાપાનના મિયાગીના દરિયાકાંઠે મોડી રાત્રે આવેલા ૬.૭ની તીવ્રતાના શક્‍તિશાળી ભૂકંપે સમગ્ર ઉત્તર જાપાનને હચમચાવી દીધું છે. જ્‍યારે આખું શહેર રાત્રિના આરામ તરફ જઈ રહ્યું હતું, ત્‍યારે રાત્રે ૮:૨૨ વાગ્‍યે આવેલા આ આંચકાએ લોકોમાં ભારે ગભરાટ ફેલાવી દીધો હતો. જમીનથી ૪૩ કિમી ઊંડે આવેલા આ ભૂકંપનું કેન્‍દ્રબિંદુ એટલું પ્રબળ હતું કે સરકારે તાત્‍કાલિક અસરથી પાંચ પ્રીફેક્‍ચરમાં કટોકટીની ચેતવણી જારી કરી દીધી હતી. જોકે, રાહતની વાત એ છે કે પ્રશાંત મહાસાગરમાં સુનામીનો કોઈ ખતરો સર્જાયો નથી, પરંતુ આંચકાની તીવ્રતા એટલી હતી કે બહુમાળી ઇમારતો લાંબા સમય સુધી ઝૂલતી જોવા મળી હતી.

ભૂકંપના પગલે જાપાનની લાઈફલાઈન ગણાતી હાઈ-સ્‍પીડ રેલ સેવાઓ ખોરવાઈ ગઈ છે. જેઆર ઈસ્‍ટે સલામતીના ભાગરૂપે ટોકયો અને શિન-આઓમોરી સ્‍ટેશનો વચ્‍ચેની શિંકાનસેન (બુલેટ ટ્રેન) સેવાઓ તાત્‍કાલિક અટકાવી દીધી હતી, જેના કારણે હજારો મુસાફરો અટવાયા હતા. મિયાગીના ટોમ અને ઇશિનોમાકી જેવા શહેરોમાં ભૂકંપની તીવ્રતા જાપાનીઝ સ્‍કેલ પર ૫ નોંધવામાં આવી હતી, જે માળખાગત નુકસાન પહોંચાડવા માટે પૂરતી ગણાય છે. હાલમાં ટેકનિકલ ટીમો રેલવે ટ્રેક અને પાવર ગ્રીડની તપાસ કરી રહી છે જેથી કોઈ મોટી દુર્ઘટના ટાળી શકાય.

જાપાન માટે આ મહિનો કુદરતી આફતોનો રહ્યો છે, કારણ કે માત્ર ૨૦ એપ્રિલના રોજ જ ૭.૭ની તીવ્રતાનો વિનાશક ભૂકંપ અનુભવાયો હતો. વારંવાર આવતા આ આફ્‌ટરશોક્‍સને કારણે આંતરરાષ્‍ટ્રીય ટ્રાવેલ એજન્‍સીઓએ પ્રવાસીઓ માટે ખાસ એડવાઈઝરી જારી કરી છે. સ્‍થાનિક પ્રશાસને લોકોને આગામી થોડા દિવસો સુધી સાવધ રહેવા અને સુરક્ષિત સ્‍થળોએ આશરો લેવાની સૂચના આપી છે. સત્તાવાળાઓ સતત પરિસ્‍થિતિ પર નજર રાખી રહ્યા છે અને પહાડી વિસ્‍તારોમાં ભૂસ્‍ખલનની શકયતાઓને પગલે લોકોને સતર્ક કરવામાં આવ્‍યા છે.