નવી દિલ્હી : વડાપ્રધાન નરેન્દ્રભાઈ મોદીએ સોશિયલ મીડિયા પ્લેટફોર્મ X પર પોસ્ટ કરીને 'Make in India'ના 10 વર્ષ પૂરા થવા પર અભિનંદન પાઠવ્યા હતા. તેમણે કહ્યું કે, આ આંદોલન તે તમામ લોકોના સતત પ્રયાસોનું પરિણામ છે જેઓ છેલ્લા એક દાયકાથી તેને સફળ બનાવવા માટે કામ કરી રહ્યા છે.
પીએમ મોદીએ ટ્વિટર પર એક પોસ્ટમાં કહ્યું, “આજે આપણે Make in India ના 10 વર્ષની ઉજવણી કરી રહ્યા છીએ. છેલ્લા એક દાયકાથી આ અભિયાનને સફળ બનાવવા માટે અથાક મહેનત કરી રહેલા તમામ લોકોને હું અભિનંદન આપું છું. 'Make in India' આપણા દેશને મેન્યુફેક્ચરિંગ અને ઇનોવેશનનું હબ બનાવવાના 140 કરોડ ભારતીયોના સામૂહિક સંકલ્પને દર્શાવે છે.
'આપણે સાથે મળીને આત્મનિર્ભર અને વિકસિત ભારતનું નિર્માણ કરીશું'
પીએમ મોદીએ કહ્યું કે, તે નોંધનીય છે કે કેવી રીતે વિવિધ ક્ષેત્રોમાં નિકાસમાં વધારો થયો છે, ક્ષમતાઓ બનાવવામાં આવી છે અને આ રીતે દેશની અર્થવ્યવસ્થા મજબૂત થઈ છે. ભારત સરકાર દરેક સંભવિત રીતે 'Make in India'ને પ્રોત્સાહિત કરવા પ્રતિબદ્ધ છે. સુધારામાં પણ ભારતની પ્રગતિ ચાલુ રહેશે. આપણે સાથે મળીને આત્મનિર્ભર અને વિકસિત ભારતનું નિર્માણ કરીશું!

તે જ સમયે, કેન્દ્રીય ગૃહમંત્રી અમિતભાઈ શાહે ટ્વિટર પર એક પોસ્ટમાં જણાવ્યું હતું કે, પીએમ મોદીએ મેન્યુફેક્ચરિંગમાં ભારતની જબરદસ્ત ક્ષમતાને પ્રકાશિત કરી છે. આત્મનિર્ભર ભારતના મંત્ર સાથે, આપણો દેશ ઉત્પાદન ક્ષેત્રે અગ્રેસર અને મૂડીરોકાણ માટેના મુખ્ય સ્થળ તરીકે ઉભરી આવ્યો છે, જે આપણા યુવાનો માટે તકોની દુનિયાનું સર્જન કરે છે.
તમને જણાવી દઈએ કે, 'Make in India' અભિયાનનો ઉદ્દેશ્ય ભારતને એક ઉત્પાદન કેન્દ્ર તરીકે સ્થાપિત કરવાનો છે, જેથી રોજગારની નવી તકો ઊભી થઈ શકે અને દેશની આર્થિક સ્થિતિ વધુ મજબૂત થઈ શકે. આ અભિયાન હેઠળ, સરકારે સ્થાનિક ઉત્પાદનને પ્રોત્સાહન આપવા અને વિદેશી રોકાણ આકર્ષવા માટે ઘણી નીતિઓ લાગુ કરી છે. 'Make in India' પહેલ 25 સપ્ટેમ્બર, 2014 ના રોજ શરૂ કરવામાં આવી હતી. આ એક 'વોકલ ફોર લોકલ' પહેલ છે જેણે દેશના ઉત્પાદન ક્ષેત્રને વિશ્વ સમક્ષ પ્રોત્સાહન આપ્યું હતું.