મેઈઝોઉ : ચીનના ગુઆંગડોંગ પ્રાંતના મેઈઝોઉ શહેરમાં રહેતા ૬૦ વર્ષીય દાદી ઝોંગ જુઆનજુઆને પોતાના પુત્રના ગેમિંગના આકર્ષણને સમજવાના પ્રયાસમાં એક અનોખો ઈતિહાસ રચી દીધો છે. ઓનલાઈન ગેમિંગની દુનિયામાં "આન્ટી જુઆન" તરીકે મશહૂર થયેલા ઝોંગે કમ્પ્યુટર ગેમ્સ લાઈવસ્ટ્રીમ કરવાનું શરૂ કરીને ૫.૨૭ લાખથી વધુ ફોલોઅર્સ મેળવ્યા છે. પોતાના પુત્ર સાથે ગાઢ સંબંધ બાંધવા અને ગેમિંગ ક્ષેત્રને સમજવા માટે શરૂ કરેલી આ સફર આજે તેમની અણધારી પરંતુ સફળ બીજી કારકિર્દી બની ગઈ છે.

પ્રાથમિક શિક્ષણ મેળવ્યા બાદ સેલ્સ અને ચાઈલ્ડકેર જેવા કામો કરી નિવૃત્ત થયેલા ઝોંગનો ગેમિંગ સાથેનો સંબંધ શરૂઆતમાં કડવો હતો. વર્ષો પહેલાં તેમનો નાનો પુત્ર સુઓડે જ્યારે શાળામાં અભ્યાસ કરતો હતો ત્યારે ગેમિંગની ટેવને કારણે તેના ગ્રેડ ઘટી જતાં, તેઓ તેને ઈન્ટરનેટ કાફેમાંથી ખેંચીને ઘરે લાવતા હતા. પરંતુ ૨૦૨૦માં નોકરી છોડ્યા બાદ પુત્રને ફરી કલાકો સુધી ગેમ રમતો જોઈને ઝોંગને ગુસ્સો આવવાને બદલે જિજ્ઞાસા થઈ, અને તેમણે પુત્ર પાસે જ ગેમ રમવાનું શીખવાનું નક્કી કર્યું.

શરૂઆતમાં ૬૦ વર્ષની ઉંમરે કમ્પ્યુટર ગેમ શીખવી ઝોંગ માટે સરળ નહોતી. નબળી દ્રષ્ટિ અને ધીમા રિફ્લેક્સીસને કારણે તેઓ રમતમાં ઘણીવાર દીવાલો સાથે અથડાતા કે વર્ચ્યુઅલ સીડીઓ પર ચાલી શકતા નહોતા. તેમ છતાં, તેમણે હાર ન માની અને સતત પ્રેક્ટિસ ચાલુ રાખી. ૨૦૨૨ સુધીમાં તેમણે ગેમિંગ કૌશલ્ય સુધારીને પોતાનું લાઈવસ્ટ્રીમિંગ શરૂ કરી દીધું.

ગુઆંગડોંગના ઉપનગરીય વિસ્તારના એક દાદીને પ્રોફેશનલ ગેમરની જેમ આત્મવિશ્વાસથી શૂટિંગ ગેમ્સ રમતા અને યુવાનોની ગેમિંગ ભાષા બોલતા જોઈને દર્શકો આશ્ચર્યચકિત થઈ ગયા હતા. હાલમાં તેઓ દરરોજ બે વાર લાઈવસ્ટ્રીમ કરે છે, જેમાં દરેક સેશનમાં સરેરાશ ૧૦,૦૦૦થી વધુ દર્શકો જોડાય છે. તેમણે અત્યાર સુધીમાં ૮,૦૦૦થી વધુ કલાકનો ગેમપ્લે સમય વિતાવ્યો છે.

ઝોંગની સૌથી યાદગાર ક્ષણ ડિસેમ્બર ૨૦૨૪માં આવી હતી, જ્યારે તેમણે 'કાઉન્ટર-સ્ટ્રાઈક: ગ્લોબલ ઓફેન્સિવ'ની ઓનલાઈન મેચમાં ભાગ લીધો હતો. આ મેચમાં વિશ્વપ્રસિદ્ધ રશિયન કિશોર ગેમર "ડોન્ક" સહિતના દિગ્ગજો સામે રમતા ઝોંગે ૧૭ વર્ષની એક ખેલાડીને ગેમમાં આઉટ કરી દીધી હતી, જેનાથી ગેમિંગ જગતમાં તેમની લોકપ્રિયતા રાતોરાત બમણી થઈ ગઈ હતી.

આન્ટી જુઆનની આ પ્રેરણાદાયી સફર દર્શાવે છે કે ઉંમર એ માત્ર એક આંકડો છે અને ઈચ્છાશક્તિ હોય તો કોઈ પણ ઉંમરે નવી ટેકનોલોજી શીખી શકાય છે. હાલમાં તેઓ ચીનના સોશિયલ મીડિયા પર લાખો યુવાનો માટે પ્રેરણાનો સ્ત્રોત બન્યા છે.