વોશિંગ્ટન ડીસી (અમેરિકા): અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામે આકરા તેવર અપનાવતા એક સનસનાટીભર્યું નિવેદન આપ્યું છે. સોશિયલ મીડિયા પ્લેટફોર્મ 'ટ્રુથ સોશિયલ' પર એક પોસ્ટ દ્વારા ટ્રમ્પે ઈરાન પર પ્રહાર કરતા કહ્યું કે, ઈરાન છેલ્લા 47 વર્ષથી હત્યાઓ અને આતંક ફેલાવીને બચી રહ્યું હતું, પરંતુ હવે સ્થિતિ સંપૂર્ણપણે બદલાઈ ગઈ છે. ટ્રમ્પે દાવો કર્યો છે કે હાલના સંઘર્ષમાં ઈરાન લશ્કરી રીતે સંપૂર્ણપણે પરાજિત થઈ ચૂક્યું છે.

પૂર્વ રાષ્ટ્રપતિઓ પર આકરા પ્રહારો

આ નિવેદન સાથે ટ્રમ્પે તેમના પુરોગામી રાષ્ટ્રપતિઓ બરાક ઓબામા અને જો બિડેનની વિદેશ નીતિઓની આકરી ટીકા કરી હતી. ટ્રમ્પે આરોપ લગાવ્યો કે ઓબામા વહીવટીતંત્રે ઈરાનને 'અબજો ડોલરની રોકડ' આપીને તેને મજબૂત બનાવ્યું હતું, જ્યારે તેહરાન વિશ્વનો નંબર વન આતંકવાદ પ્રાયોજક હોવા છતાં તેમની સામે મજબૂત વલણ અપનાવવામાં આવ્યું ન હતું. ટ્રમ્પના મતે, ઈરાની નેતાઓ ઓબામા કે બિડેન માટે કોઈ આદર ધરાવતા નહોતા અને તેઓ આ નેતાઓને 'નબળા અને બિનઅસરકારક' માનતા હતા.

'અમેરિકા પાછું આવ્યું છે'

ટ્રમ્પે પોતાની સરકારની નીતિઓને ગૌરવ સાથે રજૂ કરતા કહ્યું કે, તેમની આગેવાનીમાં અમેરિકાની લશ્કરી શક્તિનો ઉપયોગ ઈરાનના પ્રભાવને કાબુમાં લેવા માટે કરવામાં આવ્યો છે. તેમણે કટ્ટરપંથી ડાબેરીઓ અને ડેમોક્રેટ્સ પર નિશાન સાધતા કહ્યું કે, તેઓ હવે સમજી રહ્યા છે કે ઈરાન સામેના યુદ્ધમાં અમેરિકાએ કેટલી મોટી સફળતા મેળવી છે. પોતાની આક્રમક શૈલીમાં ટ્રમ્પે આખા સંદેશનો અંત "અમેરિકા પાછી આવી ગઈ છે!!!" તેવી ઘોષણા સાથે કર્યો હતો.

આ નિવેદન એવા સમયે આવ્યું છે જ્યારે વૈશ્વિક સ્તરે ઈરાન અને અમેરિકા વચ્ચેના સંબંધો નિર્ણાયક વળાંક પર છે. ટ્રમ્પના આ નિવેદને ફરી એકવાર મધ્ય પૂર્વની ભૌગોલિક રાજનીતિમાં ગરમાવો લાવી દીધો છે.