રૂા.૪૧ હજારનું ડિનર કરીને બિલ ચૂકવ્યા વગર ૪ યુવકો ફરાર
સમગ્ર ઘટના હોટેલમાં લગાવવામાં આવેલા સીસીટીવી કેમેરામાં કેદ થઈ ગઈ હતી, જેના આધારે હવે આરોપીઓની શોધખોળ હાથ ધરવામાં આવી
આગ્રા તા.૨: ઉત્તર પ્રદેશના આગ્રા શહેરની એક પ્રખ્યાત ફાઇવ સ્ટાર હોટેલ માં ૪ યુવકોએ ભવ્ય રાત્રિભોજન માણ્યા બાદ રૂા. ૪૧ હજારથી વધુનું બિલ ચૂકવ્યા વગર ફરાર થઈ જતાં હોટેલ મેનેજમેન્ટ સહિત પોલીસ તંત્ર પણ હરકતમાં આવ્યું છે. સમગ્ર ઘટના હોટેલમાં લગાવવામાં આવેલા સીસીટીવી કેમેરા માં કેદ થઈ ગઈ હતી, જેના આધારે હવે આરોપીઓની શોધખોળ હાથ ધરવામાં આવી રહી છે.
તાજગંજ પોલીસ સ્ટેશન માં નોંધાયેલી ફરિયાદ અનુસાર, હોટેલ અમર વિલાસ ના મેનેજર રોબિન ભારદ્વાજએ પોલીસને જાણ કરી હતી કે ૫ મેના રોજ હોટેલની સત્તાવાર બોર્ડ લાઇન પર એક ફોન આવ્યો હતો. ફોન કરનાર વ્યક્તિએ પોતાનું નામ અસદ ખાન હોવાનું જણાવ્યું હતું અને ૭ મેની રાત્રે ૪ લોકો માટે ટેબલ બુકિગ કરાવ્યું હતું. નક્કી કરાયેલા દિવસે ચારેય યુવકો સફેદ રંગની સ્વિફટ ડિઝાયર કારમાં હોટેલ પર પહોંચ્યા હતા. તેમનો પહેરવેશ અને વર્તન જોઈને તેઓ કોઈ સમૃદ્ધ અને પ્રભાવશાળી વ્યક્તિઓ હોવાનું લાગી રહ્યું હતું. તેથી હોટેલ સ્ટાફને તેમની ઉપર કોઈ શંકા ગઈ નહોતી.
ચારેય યુવકો હોટેલના જાણીતા અને VIP બેલેવ્યુ રેસ્ટોરન્ટમાં બેઠા હતા. અહીં તેમણે વિવિધ સ્વાદિષ્ટ વાનગીઓ (Dishes) અને મોંઘા ભોજનનો આનંદ માણ્યો હતો. મોડી રાત સુધી ચાલેલા ડિનર બાદ તેમનું કુલ બિલ રૂા.૪૧,૪૭૭ થયું હતું. પરંતુ બિલ ચૂકવવાનો સમય આવતા તેમણે પહેલેથી જ બનાવેલી યોજના મુજબ કામ શરૂ કર્યું. સૌથી પહેલા ૩ યુવકો એક પછી એક સામાન્ય રીતે રેસ્ટોરન્ટમાંથી બહાર નીકળ્યા અને VIP પાર્કિગમાં જઈ કારમાં બેસી ગયા. ત્યારબાદ તેઓ હોટેલના મુખ્ય પ્રવેશદ્વાર માંથી બહાર નીકળી ગયા.
થોડા સમય બાદ અસદ ખાન નામનો મુખ્ય આરોપી વેઇટરને સિગારેટ પીવા માટે બહાર જવાની વાત કહીને ખુલ્લા લોન તરફ ગયો હતો. હોટેલ સ્ટાફને લાગ્યું કે તે થોડીવારમાં પાછો આવી બિલની ચુકવણી કરશે. જોકે, તેણે તકનો લાભ લઈ સુરક્ષા કર્મચારીઓનું ધ્યાન ભટકાવ્યું અને મુખ્ય દરવાજા તરફ દોડી જઈ બહાર રાહ જોઈ રહેલી પોતાની કારમાં બેસીને ફરાર થઈ ગયો. જ્યારે લાંબા સમય સુધી કોઈ પણ વ્યક્તિ ટેબલ પર પરત ન આવી ત્યારે હોટેલ સ્ટાફને શંકા ગઈ. ત્યારબાદ CCTV ફૂટેજ ચકાસવામાં આવ્યું, જેમાં સમગ્ર ઘટનાનો ખુલાસો થયો.
તાજગંજ પોલીસ સ્ટેશનના ઇન્ચાર્જ ઇન્સ્પેક્ટર જસવીર સિંહ સિરોહી એ જણાવ્યું હતું કે હોટેલ મેનેજમેન્ટની ફરિયાદના આધારે છેતરપિડીનો કેસ નોંધવામાં આવ્યો છે. પોલીસ તપાસ દરમિયાન જાણવા મળ્યું કે આરોપીઓ જે સ્વિફટ ડિઝાયર કારમાં આવ્યા હતા તેનો નંબર પણ શંકાસ્પદ છે અને તે નકલી અથવા અન્ય વાહનનો હોઈ શકે છે. આ ઉપરાંત, ટેબલ બુકિગ માટે ઉપયોગમાં લેવાયેલો મોબાઇલ નંબર પણ ઘટના બાદ બંધ કરી દેવામાં આવ્યો છે. હાલમાં સર્વેલન્સ અને સાયબર સેલની મદદથી આરોપીઓની શોધખોળ ચાલી રહી છે. પોલીસે આગ્રાની તમામ લક્ઝરી અને ફાઇવ સ્ટાર હોટલોને એલર્ટ પણ જારી કર્યું છે અને આરોપીઓના ફૂટેજ શેર કરીને તેમને ઝડપથી પકડવાના પ્રયાસો તેજ કર્યા છે.
(3:24 PM IST)
છેલ્લા 8 દિવસમાં સૌથી લોકપ્રિય 
