ગાંધીનગર : કેનેડાના બ્રિટિશ કોલંબિયા સ્થિત સિકમસ નજીક હાઈવે નંબર 1 પર એક અત્યંત કમકમાટીભર્યો અને હૃદયદ્રાવક અકસ્માત સર્જાયો છે. મર્સિડીઝ પેસેન્જર વાન અને ટો ટ્રક વચ્ચે થયેલી અત્યંત ભીષણ ટક્કરમાં એક યુવતી અને ચાર ગુજરાતી યુવકોના ઘટનાસ્થળ પર જ કરુણ મોત નીપજ્યા છે, જ્યારે અન્ય 3 લોકો ગંભીર રીતે ઈજાગ્રસ્ત થતાં સારવાર હેઠળ છે. આ દર્દનાક દુર્ઘટનામાં ગાંધીનગર જિલ્લાના દશેલા ગામના યુવકનું પણ કરુણ મોત નીપજતાં તેના વતન અને પરિવારમાં ભારે શોકનું મોજું ફરી વળ્યું છે.

મળતી વિગતવાર માહિતી પ્રમાણે, ગાંધીનગર જિલ્લાના દશેલા ગામના રહેવાસી અને નિવૃત્ત પોલીસ કર્મચારી બાબુભાઈ આસોડીયાના 29 વર્ષીય પુત્ર હિરેન આસોડીયા પાંચ વર્ષ પહેલા ઉચ્ચ અભ્યાસ અર્થે સ્ટુડન્ટ વિઝા પર કેનેડા ગયો હતો. પોતાનો અભ્યાસ સફળતાપૂર્વક પૂરો કર્યા બાદ તે હાલમાં વર્ક પરમિટ પર કામ કરી રહ્યો હતો અને તેને ટૂંક સમયમાં જ પર્મનેન્ટ રેસિડેન્સી (PR) પણ મળવાની હતી. તે કેનેડામાં કાયમી સ્થાયી થઈને પોતાના માતા-પિતાને પણ ત્યાં લઈ જવાનું અદભુત સ્વપ્ન જોઈ રહ્યો હતો.

જોકે, વિધાતાને કંઈક અલગ જ મંજૂર હતું; ગત શુક્રવારે હિરેન પોતાના મિત્રો સાથે મર્સિડીઝ વાનમાં પ્રવાસે જઈ રહ્યો હતો તે જ સમયે આ ભયાનક અકસ્માત સર્જાયો હતો. કાળનો પંજો ત્રાટકતા જ ક્ષણવારમાં હિરેન સહિત અન્ય ગુજરાતી યુવાનોના આશાસ્પદ સ્વપ્નો અને ભવિષ્ય રોડ પર વિખેરાઈ ગયા હતા. અકસ્માત એટલો જોરદાર હતો કે વાનનો ભૂકો બોલી ગયો હતો અને ઘટનાસ્થળે હાજર લોકો પણ અરેરાટી વ્યાપી ગઈ હતી.

પરદેશમાં અભ્યાસ અને રોજગારી અર્થે ગયેલા તેજસ્વી ગુજરાતી યુવાનોના આ પ્રકારે અચાનક થયેલા મોતે વિદેશમાં વસતા ભારતીય સમુદાય સહિત તેમના માતૃભૂમિમાં રહેતા પરિવારોને ઊંડા આઘાતમાં સરી પાડ્યા છે. હાલમાં કેનેડિયન રોયલ માઉન્ટેડ પોલીસ દ્વારા આ અકસ્માતની કાનૂની તપાસ ચાલી રહી છે. સ્થાનિક સત્તાવાળાઓ અને ભારતીય દૂતાવાસના સંપર્ક મારફતે મૃતકોના પાર્થિવ દેહને વતન ગુજરાત લાવવા તેમજ ગંભીર ઈજાગ્રસ્તોને શ્રેષ્ઠ તબીબી સેવા પૂરી પાડવા માટે આગળની તમામ વહીવટી પ્રક્રિયાઓ હાથ ધરવામાં આવી રહી છે.