તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
યુકેમાં ૨૪ વર્ષીય ભારતીય યુવતીની ચાકૂના ઘા મારીને ઘાતકી હત્યા
કિરણદીપ કૌર પોતાના ઘરમાં સૂઈ રહી હતી ત્યારે હુમલાખોર તેના ઘરમાં ધસી આવ્યો
લંડન,તા.૧૭: યુકેમાં ૨૪ વર્ષની એક ભારતીય યુવતીની ચાકૂના ઘા મારીને ઘાતકી હત્યા કરવામાં આવી છે, ૨૪ વર્ષીય કિરણદીપ કૌર પોતાના ઘરમાં સૂઈ રહી હતી ત્યારે હુમલાખોર તેના ઘરમાં ધસી આવ્યો હતો. આ હુમલામાં કિરણદીપના પતિને પણ ઈજા પહોંચી છે અને હાલ તે હોસ્પિટલમાં સારવાર હેઠળ છે. રવિવારે સવારે વેસ્ટ લંડનના હેઝ એરિયામાં આવેલા અક્સબ્રિજ રોડ તેના પર આ જીવલેણ હુમલો કરવામાં આવ્યો હતો. પોલીસને સવારે આઠ વાગ્યે આ ઘટનાની માહિતી મળી હતી, જોકે પોલીસ સ્પોટ પર પહોંચી ત્યાં સુધીમાં કિરણદીપનું મોત થઈ ચૂક્યું હતું જ્યારે તેનો પતિ લોહીલૂહાણ હાલતમાં ઘરની બહારથી મળી આવ્યો હતો. તેને પણ ચાકૂના ઘા વાગ્યા હતા પરંતુ હાલ તેની હાલત ખતરાની બહાર છે.
ચોંકાવનારી વાત એ છે કે કિરણદીપે હજુ બે સપ્તાહ પહેલા જ એક બાળકને જન્મ આપ્યો હતો. કિરણદીપ હજુ બે વર્ષ પહેલા જ સ્ટૂડન્ટ વિઝા પર યુકે આવી હતી અને ત્યારબાદ તેણે વર્ક પરમિટ મેળવી હતી. મૃતકના પરિવારજનોનો આક્ષેપ છે કે તેના પર કરાયેલો હુમલો રેસિઝમથી પ્રેરિત હતો, મેટ્રોપોલિટન પોલીસે આ મામલામાં ડેનીયલ સીન જેમ્સ નામના ૪૪ વર્ષીય શખસનની ધરપકડ કરી છે. કિરણદીપ પર હુમલો કર્યા બાદ હુમલાખોર તેના ઘરની બારીમાંથી નીચે કૂદ્યો હતો જેના કારણે તેને ઈજાઓ પણ થઈ હતી.
કિરણદીપને તેના માતા-પિતાએ પંજાબમાં પોતાની તમામ જમીન વેચીને ભણવા માટે યુકે મોકલી હતી, તેમને આશા હતી કે જો દીકરી વિદેશમાં સેટલ થઈ જશે તો ભવિષ્યમાં આખાય પરિવારને મદદરૂપ થશે. પંજાબની એક લોકલ ન્યૂઝ ચેનલ સાથે વાત કરતા તેમણે જણાવ્યું હતું કે હુમલાખોર ધારદાર હથિયાર લઈને કિરણપ્રિતના બેડરૂમ સુધી પહોંચી ગયો હતો અને કોઈ કારણ વિના જ તેના પર જીવલેણ હુમલો કર્યો હતો. તેમણે પોતાની દીકરીનો પાર્થિવ દેહ ઈન્ડિયા પાછો લાવવા માટે સરકારની મદદ માગી છે તેમજ તેના હત્યારાને કડકમાં કડક સજા કરવામાં આવે તેવી પણ લાગણી વ્યક્ત કરી છે.
કિરણના દિયરે આ અંગે બ્રિટિશ મિડીયા સાથે વાત કરતા જણાવ્યું હતું કે તેમણે હજુ થોડા દિવસો પહેલા જ એક બાળકને જન્મ આપ્યો હતો અને ઘરના તમામ લોકો ખૂબ જ ખુશ હતા. જોકે, રવિવારે જે કંઈ થયું તેનાથી સૌ કોઈ ભારે વ્યથિત છે. કિરણની પાડોશમાં રહેતાં એક બ્રિટિશ મહિલાએ તેને ખૂબ જ ફ્રેન્ડલી ગણાવી હતી. તેમણે એવું પણ જણાવ્યું હતું કે રાતે આ બધું થયું ત્યારે તેમને કોઈની ચીસાચીસ નહોતી સંભળાઈ પરંતુ સવારે જ્યારે તેઓ ઉઠ્યા ત્યારે મોટી સંખ્યામાં પોલીસ ઓફિસર્સ દેખાતા તેમને નવાઈ લાગી હતી. જ્યારે તેમને આ ઘટનાની જાણ થઈ ત્યારે તેમને ભારે આંચકો લાગ્યો હતો. યુકેમાં રહેતા શીખ સમુદાયે પણ હત્યારાને કડકમાં કડક સજા કરી મૃતકને ન્યાય અપાવવા માગ કરી છે.
(10:27 AM IST)
છેલ્લા 8 દિવસમાં સૌથી લોકપ્રિય 
