તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
૨૪ મહિનાની દીકરીને ખાંસી મટતી જ નહોતીઃ રિમોટ કન્ટ્રોલનો ઝીણો બલ્બ ગળી ગયેલી
ડોક્ટરોએ ઇમર્જન્સીમાં બ્રોન્કોસ્કોપી કરી એમાં કેમેરાવાળું સાધન ગળા વાટે શ્વાસનળીમાં મોકલવામાં આવ્યું
ફરીદાબાદ,તા.૨૯: ફરીદાબાદની અમૃતા હોસ્પિટલમાં થોડા દિવસ પહેલાં ડોક્ટરો પાસે બે વર્ષની એક છોકરી શ્વાસ ન લઈ શકે એવી સ્થિતિમાં તડપી રહેલી હાલતમાં આવી હતી. છેલ્લા થોડા દિવસથી બાળકીને ખૂબ ખાંસી આવ્યા કરતી હતી. પેરન્ટ્સને લાગ્યું કે કદાચ સામાન્ય કફ હશે એટલે કફ સિરપ આપ્યાં, પણ ફરક ન પડ્યો. જોકે પરિસ્થિતિ ગંભીર થવા લાગી. બાળકીને શ્વાસ લેવામાં પણ તકલીફ થવા લાગી. ફેમિલી-ફિઝિશ્યનની દવા પણ બેઅસર રહેતાં તેને મોટી હોસ્પિટલમાં દાખલ કરવામાં આવી. અહીં તેના વિવિધ રિપોર્ટ્સ દ્વારા તપાસ કરવામાં આવી. એક્સ-રે પાડતાં ખબર પડી કે તેની ડાબાં ફેફસાંની શ્વાસનળીના એક ભાગમાં કશુંક ફસાઈ ગયું છે. અલગ-અલગ ઍન્ગલથી એક્સ-રે લીધા તો ખબર પડી કે બલ્બ છે. રિમોટ કન્ટ્રોલમાં લાઇટ થાય છે કે નહીં એ માટે જે ઝીણો બલ્બ હોય છે એ બારીક બલ્બ હતો. આ બલ્બ કાઢવાનું સહેલું નહોતું. એક તો અત્યંત પાતળી શ્વાસનળીમાં સાધન ખોસવું અને ત્યાંથી બલ્બ જેવા કેમિકલ ભરેલા ટુકડાને અંદર તૂટે નહીં એ રીતે બહાર કાઢવો એ બન્ને પડકારજનક હતું. ઘણા સમયથી આ બલ્બ હોવાથી શ્વાસનળીની આસપાસ સોજો વધી ગયો હતો અને ડાબાં ફેફસાંમાં શ્વાસ અંદર જઈ જ નહોતો રહ્યો. ડોક્ટરોએ ઇમર્જન્સીમાં બ્રોન્કોસ્કોપી કરી. એમાં કેમેરાવાળું સાધન ગળા વાટે શ્વાસનળીમાં મોકલવામાં આવ્યું અને એ મશીન દ્વારા જ બલ્બને બહાર ખેંચી કાઢવામાં આવ્યો. હવે બાળકી પરનું જોખમ ટળી ગયું છે. નાનાં બાળકો રમતાં હોય ત્યારે એની આસપાસ રિમોટ, કેલ્ક્યુલેટર, ચાવી કે બોલ્ટ જેવી નાની ચીજો એમ જ રાખવી કેટલી જોખમી છે એ આવા કિસ્સાઓ આપણને સતત રિમાઇન્ડ કરાવતા રહે છે.
(10:05 AM IST)
છેલ્લા 8 દિવસમાં સૌથી લોકપ્રિય 
