નવી દિલ્હી : જાપાનના આઈચી-નાગોયા ખાતે ૨૦મી એશિયન ગેમ્સનો મહાકુંભ સત્તાવાર રીતે પ્રારંભ થઈ ચૂક્યો છે. રમતગમતના આ ભવ્ય ખંડીય આયોજનના પ્રારંભે ભારતના વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ 'X' પર વિશેષ પોસ્ટ શેર કરીને સમગ્ર ભારતીય દળને પ્રોત્સાહિત કરી શુભેચ્છાઓ પાઠવી છે. વડાપ્રધાને જણાવ્યું હતું કે, "દરેક ખેલાડીએ અવિશ્વસનીય મહેનત, અસાધારણ સમર્પણ અને દ્રઢ નિશ્ચય દર્શાવ્યો છે. ભારતને તેમના પર ગર્વ છે. તેઓ તેમનું શ્રેષ્ઠ પ્રદર્શન કરે, સારું રમે અને સફળતા મેળવે!"

નાગોયાના ઝાકઝમાળથી ભરેલા મિઝુહો પાર્ક એથ્લેટિક સ્ટેડિયમ ખાતે જાપાનના સમ્રાટ નારુહિતોએ રમતો ખુલ્લી મુકાયાની સત્તાવાર ઘોષણા કરી હતી. ઉદ્ઘાટન સમારોહમાં ભારતીય દળ માટે ગૌરવપૂર્ણ ક્ષણ ત્યારે આવી જ્યારે ઓલિમ્પિક મેડલ વિજેતા મનુ ભાકર અને કબડ્ડી સ્ટાર પવન સેહરાવતે ભારતીય ત્રિરંગા સાથે દળનું નેતૃત્વ કર્યું હતું. ૨૦૨૩ની હાંગઝોઉ એશિયન ગેમ્સમાં ભારતે ૨૮ ગોલ્ડ સહિત રેકોર્ડબ્રેક ૧૦૭ મેડલ જીત્યા હતા, અને આ વખતે પણ ભારતીય ખેલાડીઓ એથી વધુ મેડલ જીતીને નવો ઇતિહાસ રચવા ઉત્સુક છે.

દિગ્ગજ ખેલાડીઓ ટાઇટલ જાળવી રાખવા મેદાનમાં ઉતરશે

આ વખાણાયેલી સ્પર્ધામાં ભારત ક્રિકેટ (પુરુષ અને મહિલા), કબડ્ડી તેમજ પુરુષ હોકી ટીમ ડિફેન્ડિંગ ચેમ્પિયન તરીકે પોતાના ગોલ્ડ મેડલનું રક્ષણ કરવા માટે મેદાનમાં ઉતરશે. આ ઉપરાંત, બેડમિન્ટનમાં પી.વી. સિંધુ, વેઈટલિફ્ટિંગમાં મીરાબાઈ ચાનુ, શૂટિંગમાં મનુ ભાકર અને કુસ્તીમાં અમન સેહરાવત જેવા દિગ્ગજો ભારતનું પ્રતિનિધિત્વ કરશે. એથ્લેટિક્સમાં તજિંદરપાલ સિંહ તૂર, ગુલવીર સિંહ, મુરલી શ્રીશંકર અને પારુલ ચૌધરી સહિત ૭૫થી વધુ ટ્રેક એન્ડ ફિલ્ડ એથ્લેટ્સ ભારતનો ઝંડો બુલંદ કરવા તત્પર છે.