૨૦૦૯નો ‘વોટિંગ સીડી' વિવાદઃ ૫ ઓગસ્ટે કલ્યાણ કોર્ટમાં વર્ચ્યુઅલી પેશ થશે ઉદ્ધવ ઠાકર
૧૭ વર્ષ જૂના હાઇ-પ્રોફાઇલ કેસમાં ભૂતપૂર્વ મુખ્યમંત્રીની રૂબરૂ હાજરી અંગેની અટકળોનો અંતઃ ‘ગમે તેમ કરીને ચૂંટણી જીતો' વાળા ઉશ્કેરણીજનક નિવેદનથી ભડક્યો હતો વિવાદઃ આરોપીઓમાં એકનાથી શિંદે પણ છે
કલ્યાણઃ મહારાષ્ટ્રના રાજકારણમાં ભારે ચર્ચા જગાવનારા ૧૭ વર્ષ જૂના હાઇ-પ્રોફાઇલ સીડી વિવાદ કેસમાં એક મોટું અપડેટ સામે આવ્યું છે. શિવસેના (યુબીટી) ના પ્રમુખ અને મહારાષ્ટ્રના ભૂતપૂર્વ મુખ્યમંત્રી ઉદ્ધવ ઠાકરે ૨૦૦૯ની લોકસભા ચૂંટણી પ્રચાર દરમિયાન સામે આવેલી વિવાદાસ્પદ સીડી સંબંધિત કેસમાં આગામી ૫ ઓગસ્ટે કલ્યાણ સેશન્સ કોર્ટ સમક્ષ વિડીયો કોન્ફરન્સિંગ દ્વારા વર્ચ્યુઅલી હાજર થશે.
છેલ્લા કેટલાક દિવસોથી ઉદ્ધવ ઠાકરે પોતે વ્યક્તિગત રીતે કોર્ટમાં હાજર રહેવાના છે તેવી અટકળોને કારણે રાજકીય વર્તુળો અને સુરક્ષા એજન્સીઓમાં ભારે દોડધામ મચી ગઈ હતી. જોકે, શિવસેનાના પ્રવક્તા અને વકીલ જયેશ વાણીએ કલ્યાણ સેશન્સ કોર્ટ પરિસરમાં પત્રકારો સાથે વાતચીત કરતી વખતે આ અટકળોને સરેરાશ ફગાવી દીધી છે. તેમણે સ્પષ્ટતા કરી હતી કે કોર્ટની નિયમબદ્ધ વ્યવસ્થા અનુસાર ઠાકરે વર્ચ્યુઅલ માધ્યમથી જ સુનાવણીમાં ભાગ લેશે અને તેમને શારીરિક રીતે રૂબરૂ આવવાની કોઈ જરૂર નથી. આ સમગ્ર મામલો ૨૦૦૯ની કલ્યાણ લોકસભા બેઠકના ચૂંટણી પ્રચાર દરમિયાનનો છે. તે સમયે એક કથિત વિવાદાસ્પદ સીડી જાહેર કરવામાં આવી હતી, જેમાં શિવસેનાના કાર્યકરોને કોઈપણ ભોગે ચૂંટણી જીતવા માટે ઉશ્કેરવામાં આવ્યા હોવાનો આરોપ મૂકાયો હતો.
ફરિયાદ મુજબ, રેકોર્ડિગમાં તેમને માર માર, ગમે તે કર, પણ આપણે આ ચૂંટણી જીતવી જ પડશે જેવા ઉશ્કેરણીજનક નિવેદનોનો સમાવેશ થતો હતો. આ સીડી સામે આવ્યા બાદ વિરોધી રાજકીય પક્ષ દ્વારા કાનૂની ફરિયાદ નોંધાવવામાં આવી હતી, જેમાં ઉદ્ધવ ઠાકરે, એકનાથ શિંદે અને રાજેન્દ્ર દેવલેકર સહિતના અન્ય અગ્રણી નેતાઓને આરોપી બનાવવામાં આવ્યા હતા.
(1:22 PM IST)
છેલ્લા 8 દિવસમાં સૌથી લોકપ્રિય 
