મંદસૌર તા.૧૧: જિલ્‍લામાંથી એક એવો કિસ્‍સો સામે આવ્‍યો છે, જેણે પરિવાર, પોલીસ અને ગામના લોકોને ચોંકાવી દીધા છે. અહીં ભાનપુરા વિસ્‍તારના બાબુલ્‍દા ગામમાં રહેતા ૧૭ વર્ષીય કિશોરે પ્રેમ પ્રસંગના કારણે પોતાના જ ઘરમાંથી લાખો રૂપિયાના સોના-ચાંદીના દાગીના ચોરી લીધા. ત્‍યાર બાદ તેણે આ દાગીના પોતાની સગીર પ્રેમિકાને સોંપી દીધા અને પરિવાર સાથે દિલ્‍હી જઈને અચાનક ગાયબ થઈ ગયા. પરિવાર પહેલા જ દીકરાના ગુમ થવાથી પરેશાન હતો, પણ હવે જ્‍યારે ઘરની તિજોરી ખોલી તો મામલો વધારે ગંભીર થઈ ગયો. તિજોરીમાંથી લગભગ ૧૫થી ૨૦ લાખ રૂપિયાના દાગીના ગાયબ મળ્‍યા. પોલીસ તપાસમાં જે ખુલાસો થયો, તેણે સૌને ચોંકાવી દીધા.

પોલીસની શરૂઆતી તપાસમાં સામે આવ્‍યું કે કિશોરે ખૂબ જ ચાલાકીથી પ્‍લાન બનાવી પહેલા તો દાગીના કાઢ્‍યા અને પછી પ્રેમિકાને આપી દીધા. ત્‍યાર બાદ ખુદ દિલ્‍હીમાં જઈને ગાયબ થઈ ગયો. જ્‍યારે પોલીસે સાયબર તપાસ અને કોલ ડિટેલ્‍સ ખંગાળી, તો ગામની જ એક સગીર છોકરી સાથે તેના સંબંધોનો ખુલાસો થયો. બાદમાં છોકરીએ પૂછપરછમાં બધા ભાંડા ફોડી દીધા. પોલીસે બંને સગીર પર ચોરીનો મામલો નોંધી ઝુવેનાઈલ કોર્ટમાં હાજર કર્યા, જ્‍યાં હાલમાં તો તેમને જામીન મળી ગયા છે.

ભાનપુરા પોલીસના જણાવ્‍યા અનુસાર, બાબુલ્‍દા ગામના રહેવાસી કિશોર ૨૦ એપ્રિલના રોજ પોતાની માતાની સારવાર કરાવવા માટે દિલ્‍હી એઈમ્‍સમાં ગયો હતો. પરિવાર હોસ્‍પિટલમાં સારવારમાં વ્‍યસ્‍ત હતો. આ દરમ્‍યાન કિશોર અચાનક ગુમ થઈ ગયો. પરિવારે પહેલા ખુદ શોધખોળ કરી, પણ જ્‍યારે કોઈ જાણકારી મળી નહીં તો દિલ્‍હીના સફદરગંજ પોલીસ સ્‍ટેશનમાં ફરિયાદ નોંધાવી. પરિવાર હજુ તો આ આઘાતમાંથી બહાર નહોતો આવ્‍યો તો ઘરમાંથી લાખો રૂપિયાના દાગીના ચોરી થવાની જાણકારી સામે આવી. પરિવારે જ્‍યારે તિજોરી ચેક કરી તો સોના-ચાંદીના દાગીના દેખાયા નહીં. ત્‍યાર બાદ મામલો સીધો ભાનપુરા પોલીસ સુધી પહોંચ્‍યો.

પોલીસે આ મામલાને ગંભીરતાથી લેતા સાયબર સેલની મદદ લીધી. કિશોરના મોબાઈલની કોલ ડિટેલ્‍સ અને લોકેશન ખંગાળી. તપાસ દરમ્‍યાન ગામની જ એક છોકરી સાથે સતત સંપર્કની જાણકારી મળી. પોલીસને શંકા ગઈ કે મામલો ખાલી ગુમ થવાનો નહોતો. જ્‍યારે છોકરી સાથે પૂછપરછ કરી તો તેણે કબૂલ કર્યું કે કિશોર દિલ્‍હી જતાં પહેલા ચોરી કરેલા દાગીના છોકરીને આપીને ગયો હતો. પોલીસે તેની પાસેથી લાખો રૂપિયાના દાગીના જપ્ત કરી લીધા. તપાસમાં સામે આવ્‍યું કે બંને વચ્‍ચે લાંબા સમયથી પ્રેમ સંબંધ હતો.

પોલીસ તપાસ થવા અને પ્રેમિકાનું રહસ્‍ય ખુલી જવાની જાણકારી મળ્‍યા બાદ કિશોર ખુદ દિલ્‍હીના સફદરગંજ પોલીસ સ્‍ટેશનમાં પહોંચી ગયો. ૫ મેના રોજ તેણે પોલીસને જણાવ્‍યું કે તે સુરક્ષિત છે. ત્‍યાર બાદ પરિવાર દિલ્‍હી પહોંચ્‍યો અને તેને પાછા લઈ આવ્‍યા. ભાનપુરા પ્રભારી રમેશચંદ્ર ડાંગીએ જણાવ્‍યું કે શરૂઆતી તપાસમાં પોલીસને શંકા ગઈ હતી કે ચોરી કોઈ બહારની વ્‍યક્‍તિએ નહીં પણ ઘરના કોઈ જાણકારે જ કરી છે. પછી તપાસ એ દિશામાં આગળ વધારી.

પોલીસે બંને સગીરો વિરુદ્ધ ચોરીનો કેસ નોંધી લીધો છે. બંનેને ઝુવેનાઈલ કોર્ટમાં રજૂ કર્યા, જ્‍યાં હાલમાં તો તેમને જામીન મળી ગયા છે. પોલીસનું કહેવું છે કે આ મામલામાં આગળ પણ તપાસ ચાલુ રહેશે