નવી દિલ્હી | તા.31: મધ્ય પૂર્વમાં ચાલી રહેલા અશાંત અને યુદ્ધગ્રસ્ત માહોલે અનેક નિર્દોષ ભારતીયોના ભવિષ્ય પર પ્રશ્નાર્થ ચિહ્ન મૂકી દીધું છે. રાજ્યસભામાં CPI(M) ના સાંસદ જોન બ્રિટાસ દ્વારા પૂછવામાં આવેલા સવાલના લેખિત જવાબમાં વિદેશ રાજ્યમંત્રી કીર્તિ વર્ધન સિંહે જણાવ્યું હતું કે આ વર્ષે મધ્ય પૂર્વમાં સંઘર્ષ શરૂ થયા પછી અત્યાર સુધીમાં ૧૦ ખલાસીઓ સહિત ૧૬ ભારતીયોના મોત થયા છે. આ દુર્ઘટનાઓમાં સાઉદી અરેબિયામાં ૧, કુવૈતમાં ૨, ઓમાનમાં ૮, ઇરાકમાં ૧ અને સંયુક્ત આરબ અમીરાત (UAE) માં ૪ ભારતીય નાગરિકોના મૃત્યુ નીપજ્યા છે. આ ઉપરાંત, વિવિધ દેશોમાં થયેલા હુમલાઓ અને સંઘર્ષમાં કુલ ૭૫ ભારતીયો ઘાયલ થયા છે, જેમાં સૌથી વધુ ૩૨ ઘાયલ યુએઈમાં અને ૨૪ ઓમાનમાં નોંધાયેલા છે. 
સરકારે સંસદમાં એ પણ સ્પષ્ટ કર્યું છે કે યુદ્ધના હુમલાઓથી અલગ એવા એક અકસ્માતમાં કતારની રાસ લફાન ગેસ સુવિધામાં થયેલી દુર્ઘટનામાં વધુ ૧૨ ભારતીય નાગરિકોએ પણ પોતાના જીવ ગુમાવ્યા હતા. વિદેશ મંત્રાલય દ્વારા તાત્કાલિક ધોરણે યજમાન દેશોની સરકારો સાથે સંકલન સાધીને મૃતકોના પાર્થિવ દેહને ભારત વહેલા પરત મોકલવાની તમામ વ્યવસ્થાઓ કરવામાં આવી છે. તેમજ ઘાયલ થયેલા નાગરિકોને સ્થાનિક હોસ્પિટલોમાં યોગ્ય તબીબી સારવાર મળી રહે તે માટે ભારતીય દૂતાવાસો સતત સક્રિય રહીને પરિવારોને માર્ગદર્શન અને સહાય પૂરી પાડી રહ્યા છે. 
આર્થિક સહાય અને વળતર: યુદ્ધ-ક્ષેત્રની ઘટનાઓ સાથે સંકળાયેલા કિસ્સાઓમાં DGMA કલ્યાણ યોજના (સીફેરર્સ વેલ્ફેર ફંડ સોસાયટી - SWFS) હેઠળ ૧૦ લાખ રૂપિયાનું એક્સ-ગ્રેશિયા વળતર આપવામાં આવે છે. આ ઉપરાંત મેરીટાઇમ યુનિયન ઓફ ઇન્ડિયા દ્વારા અધિકારીઓ માટે ૧૨ લાખ રૂપિયા અને નેશનલ યુનિયન ઓફ સીફેરર્સ ઓફ ઇન્ડિયા દ્વારા ક્રૂ મેમ્બર્સ માટે ૧૦ લાખ રૂપિયા સુધીનું વધારાનું યુદ્ધ-ક્ષેત્ર વળતર પણ મળવાપાત્ર છે. 
ઈરાન અને અન્ય પ્રદેશોમાં ફસાયેલા ભારતીયો અંગે વાત કરતા મંત્રીએ ઉમેર્યું કે ફેબ્રુઆરી ૨૦૨૬માં પશ્ચિમ એશિયામાં દુશ્મનાવટ શરૂ થઈ ત્યારથી તેહરાનમાં સ્થિત ભારતીય દૂતાવાસે ૨,૫૫૭ જેટલા ભારતીયોની સરહદ પારની અવરજવરને સુરક્ષિત રીતે પાર પાડવામાં મદદ કરી છે. હાલ અંદાજે ૭,૦૦૦ જેટલા ભારતીયો ઈરાનમાં હોવાનો અંદાજ છે, જેમાં વિદ્યાર્થીઓ અને કામદારો સામેલ છે. બીજી તરફ અમેરિકામાં તાજેતરમાં 'ઓપરેશન ચેકમેટ' હેઠળ ધરપકડ કરાયેલા ૩૦ ભારતીય નાગરિકોના મામલે પણ વોશિંગ્ટન સ્થિત ભારતીય દૂતાવાસે યુએસ સત્તાવાળાઓ પાસેથી સત્તાવાર વિગતો માંગી છે, જેથી આ તમામ નાગરિકોને કાનૂની અને રાજદ્વારી સહાય પૂરી પાડી શકાય.