કેપ કેનાવેરલ: વિશ્વના સૌથી શક્તિશાળી રોકેટ સ્ટારશીપે શુક્રવારે દક્ષિણ ટેક્સાસ સ્થિત સ્પેસએક્સની પરીક્ષણ સુવિધા પરથી સફળતાપૂર્વક પોતાની ૧૩મી પરીક્ષણ ઉડાન પૂર્ણ કરી છે. આ મહત્વપૂર્ણ મિશન દરમિયાન સ્પેસએક્સના ૪૦૭ ફૂટ ઊંચા સ્ટારશીપ રોકેટે ૨૦ સ્ટારલિંક ઉપગ્રહોને અવકાશમાં સફળતાપૂર્વક લોન્ચ કર્યા છે, જે નાસાના આગામી ચંદ્ર મિશન માટે ખૂબ જ નિર્ણાયક માનવામાં આવી રહ્યા છે.

આ ઉડાન દરમિયાન બૂસ્ટરના પાછા ફરવા વખતે એન્જિન ફરીથી શરૂ ન થવાને કારણે તે મેક્સિકોના અખાતમાં પડી ગયું હતું, પરંતુ સ્ટારશીપે પૂર્વ તરફ આગળ વધીને ૨૦૦ કિલોમીટરની ઊંચાઈએ તમામ ૨૦ સ્ટારલિંક ઉપગ્રહોને ભ્રમણકક્ષામાં સફળતાપૂર્વક સ્થાપિત કર્યા હતા. આ ઉપગ્રહો અગાઉના મોડેલો સાથે લેસર દ્વારા કનેક્ટ થવાની ક્ષમતા ધરાવે છે. મિશનના અંતે હિંદ મહાસાગરમાં સ્ટારશિપનું અત્યાર સુધીનું સૌથી સુરક્ષિત સ્પ્લેશડાઉન થયું હતું, જ્યાં નવા કેમેરા અને સેન્સર દ્વારા વાતાવરણના તાપમાન અને દબાણની સચોટ માહિતી પ્રાપ્ત થઈ છે.

અગાઉના મે મહિનાની ઉડાન અને ગયા અઠવાડિયે એન્જિનની સમસ્યાના કારણે લોન્ચિંગ રદ થવા જેવી મુશ્કેલીઓનો સામનો કર્યા બાદ સ્પેસએક્સ માટે આ સફળતા મોટી ઉપલબ્ધિ છે. નાસાના એડમિનિસ્ટ્રેટર જેરેડ આઇઝેકમેને પણ આ મિશનના મહત્વને વખાણ્યું છે. આગામી સમયમાં આ ટેકનોલોજીનો ઉપયોગ અવકાશયાત્રીઓને ચંદ્ર પર મોકલવા માટે કરવા બાબતે વૈજ્ઞાનિકો વધુ સઘન સંશોધન અને પરીક્ષણો હાથ ધરશે.