બિહારના સીતામઢીમાં ૧૧ વર્ષની બાળકી સાથે રસ્તા પર દુષ્કર્મ
ગુસ્સે ભરાયેલા ટોળાની હિંસા...અનેક જગ્યાએ ટાયરો સળગાવ્યા હતા અને શાકભાજી તેમજ ફળોની લારીઓને પણ આગને હવાલે કરી
સીતામઢી તા.૧૪: બિહારના સીતામઢી જિલ્લામાં એક હૃદયદ્રાવક ઘટના સામે આવી છે, જ્યાં ૧૧ વર્ષની માસૂમ બાળકી સાથે ધોળે દિવસે રસ્તા પર દુષ્કર્મ આચરવામાં આવ્યું છે. આ ઘટનાને પગલે સમગ્ર જિલ્લામાં ભારે તંગદિલી ફેલાઈ ગઈ છે અને લોકોનો ગુસ્સો સાતમા આસમાને પહોંચ્યો છે.
મંગળવારની મોડી રાત્રે જ્યારે માસૂમ બાળકી તેની નાનીના ઘરે જઈ રહી હતી, ત્યારે રસ્તામાં નશામાં ધૂત એક યુવકે તેને એકલી જોઈ તેની સાથે બળજબરી કરી હતી. પીડિતાની બૂમો સાંભળીને આસપાસના લોકો દોડી આવ્યા હતા, પરંતુ ત્યાં સુધીમાં આરોપી ફરાર થઈ ગયો હતો. પોલીસે અનેક સ્થળે દરોડા પાડ્યાં પરંતુ હજી સુધી આરોપી ઝડપાયો નથી.
ઘટનાની જાણ થતાં જ લોકોના ટોળા રસ્તા પર ઉતરી આવ્યા હતા અને મુખ્ય માર્ગો જામ કરી વિરોધ પ્રદર્શન કર્યું હતું. પ્રદર્શન દરમિયાન ઉગ્ર બનેલા ટોળાએ અનેક જગ્યાએ ટાયરો સળગાવ્યા હતા અને શાકભાજી તેમજ ફળોની લારીઓને પણ આગને હવાલે કરી દીધી હતી, જેના કારણે આશરે ચાર કલાક સુધી શહેરમાં અરાજકતાનો માહોલ રહ્યો હતો.
સ્થિતિની ગંભીરતા જોતા સંવેદનશીલ વિસ્તારોમાં ચુસ્ત પોલીસ બંદોબસ્ત ગોઠવી દેવામાં આવ્યો છે. પીડિતાને તબીબી સારવાર માટે હોસ્પિટલ ખસેડવામાં આવી છે અને પોલીસે ઘટનાસ્થળેથી મહત્વના પુરાવા એકત્ર કર્યા છે. SDPO રાજીવ કુમાર સિહના નેતૃત્વમાં SITની રચના કરવામાં આવી છે અને આરોપીને પકડવા માટે સતત દરોડા પાડવામાં આવી રહ્યા છે. આરોપીની ઓળખ પીડિત પક્ષના પરિચિત તરીકે થઈ છે અને હાલ તેના પરિવારના સભ્યોની અટકાયત કરી પૂછપરછ હાથ ધરાઈ છે
(10:31 AM IST)
છેલ્લા 8 દિવસમાં સૌથી લોકપ્રિય 
