તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
જેને સાચો પ્રેમ માન્યો તે AI નીકળ્યો! પ્રેમજાળમાં ૮૦ વર્ષિય વૃદ્ધાએ ૧.૭ કરોડ ગુમાવ્યા
સોશિયલ મીડિયા પર આર્ટિફિશિયલ ઇન્ટેલિજન્સની મદદથી ચાલી રહેલા એક સનસનાટીપૂર્ણ કૌભાંડમાં બ્રિટનની ૮૦ વર્ષીય વૃદ્ધ મહિલા પોતાની સમગ્ર બચતના ૧.૭ કરોડ રૂપિયા ગુમાવી બેઠી : ફેસબુક પર અજાણ્યા ઠગ ગેંગે AI ની મદદથી નકલી ફોટા અને ક્લોન કરેલા વોઈસ મેસેજ મોકલી પ્રેમજાળ બિછાવી હતી અને બીમારી તથા અપહરણના ખોટા બહાના હેઠળ આ જંગી રકમ પડાવી
લંડન તા.૨: બ્રિટનની ૮૦ વર્ષીય વૃદ્ધા ફેસબુક પર AI બોયફ્રેન્ડની પ્રેમજાળમાં ફસાઈને ૧.૭ કરોડ રૂપિયા ગુમાવી બેઠી છે. ઠગોએ AI આધારિત અવાજ અને ફોટા બનાવી બીમારી તથા અપહરણના ખોટા બહાના હેઠળ આ જંગી રકમ પડાવી હતી. મહિલાએ પુસ્તકમાં છુપાવીને પણ રોકડ મોકલી હતી. આ ઘટના દર્શાવે છે કે આધુનિક ડિજિટલ રોમાન્સ સ્કેમ્સ કેટલા જોખમી બન્યા છે.
ડિજિટલ દુનિયામાં એકલતા અનુભવતા વડીલોને ટાર્ગેટ કરતું એક અત્યંત ચોંકાવનારું આંતરરાષ્ટ્રીય રોમાન્સ સ્કેમ સામે આવ્યું છે. ડેઇલી સ્ટાર અને બીબીસીના એક સંયુક્ત તપાસ અહેવાલ મુજબ બ્રિટનમાં રહેતી ૮૦ વર્ષીય એક વૃદ્ધા સાથે ફેસબુક પર સંપર્ક સાધીને ગઠિયાઓએ પોતાના પ્રેમમાં અંધ કરી દીધી હતી. પીડિત મહિલા માનતી હતી કે તે કોઈ સાચા વ્યક્તિ સાથે આત્મીય સંબંધમાં છે, પરંતુ વાસ્તવમાં તે ડિજિટલ સાયબર માફિયાઓની એક આખી ટોળકી હતી.
આ સાયબર અપરાધીઓએ મહિલાની સંવેદનાઓ અને સહાનુભૂતિનો ઘૃણાસ્પદ ફાયદો ઉઠાવીને તબક્કાવાર કુલ ૧,૪૦,૦૦૦ પાઉન્ડ એટલે કે ભારતીય ચલણમાં આશરે ૧.૭ કરોડ રૂપિયાની તોતિગ રકમ ખંખેરી લીધી હતી.
ઠગોએ મહિલાને જાળમાં ફસાવવા માટે એક પછી એક ઈમોશનલ પટકથાઓ તૈયાર કરી હતી. શરૂઆતમાં કહેવાતા ઓનલાઈન બોયફ્રેન્ડ ગંભીર બીમારીમાં સપડાયા હોવાનું નાટક કરાયું હતું. મહિલાને વિશ્વાસ અપાવવામાં આવ્યો હતો કે મોંઘા ઓપરેશન વગર તેનો જીવ બચશે નહીં.
ખોખલા પુસ્તકમાં રોકડની હેરાફેરીઃ એક તબક્કે મહિલાએ ૧૦,૦૦૦ પાઉન્ડ (આશરે ૧૧ લાખ રૂપિયા) એક જાડા પુસ્તકને અંદરથી પોલું કરીને તેમાં ચલણી નોટો સંતાડી પાર્સલ મારફતે મોકલી આપી હતી.
આંતરરાષ્ટ્રીય હોસ્પિટલનું બહાનું : મહિલાને કહેવામાં આવ્યું હતું કે આ રોકડ ચીનના શંઘાઈ સ્થિત સ્પેશિયાલિટી હોસ્પિટલ સુધી ઈમરજન્સી મેડિકલ બિલ ચૂકવવા પહોંચાડવાની છે.
ભાવનાત્મક બ્લેકમેઇલઃ દર વખતે દર્દનાક ફોન કોલ્સ અને રોકકળ કરતા મેસેજ મોકલી વધુ પૈસા ટ્રાન્સફર કરવા દબાણ કરાતું હતું.
જ્યારે રોકડ રકમો આવવાની ધીમી પડી ત્યારે ઠગ ગેંગે વધુ એક ખૌફનાક રસ્તો અજમાવ્યો. વૃદ્ધાને એક મેસેજ મળ્યો કે તેના બોયફ્રેન્ડનું આંતરરાષ્ટ્રીય અપહરણકારોએ અપહરણ કરી લીધું છે. જો તાત્કાલિક કરોડો રૂપિયાની ફિરોતી નહીં ચૂકવાય તો તેની નિર્મમ હત્યા કરી દેવામાં આવશે. સાથીનો જીવ બચાવવાના ડરે ગભરાયેલી વૃદ્ધાએ પોતાની તમામ થાપણો મોકલી આપી હતી.
આ સમગ્ર કાવતરાની જાણ જ્યારે પીડિતાની દીકરી હેલનને થઈ ત્યારે તેણે માતાને સત્ય સમજાવવાનો પૂરો પ્રયાસ કર્યો હતો. જોકે, માનસિક રીતે વશ થઈ ચૂકેલી માતાએ દીકરી પર અવિશ્વાસ કરી તેને પોતાના અંગત સંબંધોમાં દખલગીરી ગણી હતી. દીકરીના જણાવ્યા મુજબ સામાન્ય પરિવારો પાસે આવા હાઇટેક સ્કેમ સામે લડવા માટે કોઈ માર્ગદર્શન કે સાધનો હોતા નથી. બેંકે હાલ માત્ર ૪૫,૦૦૦ પાઉન્ડ પરત અપાવવામાં મદદ કરી છે.
આ કેસમાં સૌથી ખતરનાક બાબત એ હતી કે સાયબર ગુનેગારોએ આર્ટિફિશિયલ ઇન્ટેલિજન્સ ટૂલ્સનો ઉપયોગ કરીને નકલી વ્યક્તિના અસલી જેવા લાગતા ફોટા અને વોઈસ ક્લોનિગ દ્વારા જીવંત ઓડિયો મેસેજ બનાવ્યા હતા.
સોશિયલ મીડિયા કંપની મેટા (ફેસબુક) એ જણાવ્યું છે કે તેઓ આવા રોમાન્સ ફ્રોડ અટકાવવા સતત સેફટી ફીચર્સ અપગ્રેડ કરી રહ્યા છે. બીજી તરફ બ્રિટનની સિનિયર સિટીઝન સંસ્થા Age UK અનુસાર જો કોઈ પણ ઓનલાઈન પરિચિત વ્યક્તિ અચાનક બીમારી, મુસાફરી કે અપહરણના નામે નાણાં માંગે તો પૈસા આપતાં પહેલાં તટસ્થ ચકાસણી કરવી જોઈએ. ખાસ કરીને જ્યાં સુધી વ્યક્તિ રૂબરૂ કે અધિકૃત વીડિયો કોલ પર પોતાની ઓળખ સાબિત ન કરે ત્યાં સુધી એક પણ રૂપિયો ટ્રાન્સફર કરવો નહીં.
(10:21 AM IST)
છેલ્લા 8 દિવસમાં સૌથી લોકપ્રિય 
