કુસ્રા : વેસ્ટ બેંકના ડુંગરાળ વિસ્તારોમાં કાયદો અને વ્યવસ્થાના ધજાગરા ઉડાવતા ઉગ્રવાદી ઇઝરાયેલી યુવાનો અને નોમેડ્સનો ત્રાસ સતત વધી રહ્યો છે. લુઈ રિડી નામના ૪૬ વર્ષીય અમેરિકી નાગરિક, જેઓ ઓહાયોથી પોતાના વતન કુસ્રા ગામમાં પાછા ફર્યા છે, તેઓ પોતાના ઘરની બાલ્કનીમાંથી આ ખતરનાક ગતિવિધિઓ પર નજર રાખી રહ્યા છે. ઇઝરાયેલી યુવા સ્ક્વોટર્સ અને આત્યંતિકવાદીઓ પેલેસ્ટિનિયન પરિવારોને ડરાવવા, તેમની ગોપનીયતા છીનવી લેવા અને તેમને તેમની જમીનો છોડવા મજબૂર કરવા માટે ભયનું વાતાવરણ ઊભું કરી રહ્યા છે.

આ ઉગ્રવાદી યુવાનોના છૂટાછવાયા નેટવર્કને હિલટોપ યુથ તરીકે ઓળખવામાં આવે છે, જેઓ મુખ્ય પ્રવાહના સમાજથી દૂર ઘાસના મેદાનો અને પહાડોમાં નોમેડ્સ તરીકે જીવન વિતાવે છે. તેમનો મુખ્ય ઉદ્દેશ્ય ભવિષ્યમાં કોઈપણ પેલેસ્ટિનિયન રાષ્ટ્રના નિર્માણની શક્યતાને હંમેશ માટે ખતમ કરવાનો છે. આ યુવાનો ખુલ્લી જમીનો પર અસ્થાયી આશ્રયસ્થાનો બનાવીને કબજો જમાવે છે અને બાદમાં ત્યાં પાકા મકાનો બનાવીને કાયમી વસાહતો ઊભી કરે છે. પેલેસ્ટિનિયનો પર અત્યાચાર ગુજારવા અને તેમના ઘરોમાં ઘૂસીને ધાકધમકી આપવાના અનેક વીડિયો પણ સામે આવ્યા છે.

હિલટોપ યુથના સભ્યો પોતાને કોઈપણ કાયદાથી ઉપર માને છે અને દાવો કરે છે કે આ જમીન તેમને ઇશ્વર દ્વારા આપવામાં આવી છે. બાઇબલની કલમો ટાંકીને તેઓ આ હિંસા અને બદલાની કાર્યવાહીને યોગ્ય ઠેરવે છે. સુરક્ષા અધિકારીઓ અને માનવાધિકાર વકીલોના જણાવ્યા અનુસાર, આ વસાહતીઓ દ્વારા પેલેસ્ટિનિયનો પર નિયમિતપણે હુમલા કરવામાં આવે છે, તેમના વાહનો સળગાવવામાં આવે છે અને મિલકતોને નુકસાન પહોંચાડવામાં આવે છે. તાજેતરની હિંસક અથડામણોમાં અનેક લોકોએ જીવ ગુમાવ્યા છે, જેના કારણે આંતરરાષ્ટ્રીય સ્તરે પણ ચિંતા વ્યક્ત કરવામાં આવી છે.

સરકાર અને સુરક્ષા દળો સામે પણ આ તોફાની યુવાનો પડકાર ફેંકતા રહે છે અને કાયદો અમલીકરણના પ્રયાસોને નકારી કાઢે છે. નિષ્ણાતોનું માનવું છે કે આ ઉગ્રવાદીઓની સંખ્યા ભલે ઓછી હોય, પરંતુ તેમની કટ્ટર વિચારધારા અને કટિબદ્ધતા ઇઝરાયેલ અને પેલેસ્ટિનિયન ક્ષેત્રોમાં શાંતિ સ્થાપવાના પ્રયાસો માટે મોટો પડકાર બની ગઈ છે.