નવી દિલ્હી:રશિયા અને યુક્રેન વચ્ચે છેલ્લા વિતેલા સમયથી ચાલી રહેલા વિનાશક સંઘર્ષના મોરચેથી કાળજું ચીરી નાખે તેવા અને રૂવાડાં ઊભા કરી દે તેવા અત્યંત ચોંકાવનારા, ખૌફનાક અને સનસનાટીભર્યા અહેવાલો સામે આવ્યા છે! બંને દેશો વચ્ચે યુદ્ધની જ્વાળાઓ શમવાનું નામ નથી લઈ રહી, ત્યારે તાજેતરમાં જ વિમાન અને ડ્રોન મારફતે કરવામાં આવેલા અંધાધૂંધ અને પ્રચંડ રોકેટ-મિસાઈલ પ્રહારોએ ભારે તબાહી મચાવી દીધી છે.
રશિયાએ યુક્રેનની હોસ્પિટલો, પાવર પ્લાન્ટ, રહેણાંકના વિસ્તારો, શેલ્ટર સ્થળ કે રાહત કેમ્પો પર બેફામ હુમલા કર્યા હતા. જેને કારણે અનેક હોસ્પિટલોને ભારે નુકસાન થયું હતું. રાતભર કરાયેલા આ હુમલાઓમાં કુલ ૩૧ લોકો માર્યા ગયા છે. જ્યારે કાટમાળમાં અનેક લોકો હજુ પણ દટાયેલા હોવાના અહેવાલો છે. યુક્રેનના ઝેપોરિઝઝીયા પ્રાંતમાં એક શેલ્ટર હોમના કાટમાળ નીચે ૪૫થી વધુ લોકો દટાયેલા હતા, જેેમને રેસ્ક્યૂ કરવા માટે ઓપરેશન શરૂ કરાયું હતું.
રશિયાએ યુક્રેન પર રાતભર ૨૮૯ ડ્રોન, ૧૭ બેલિસ્ટિક મિસાઇલો અને ૫૯ ક્રૂઝ મિસાઇલો છોડી હતી. સમગ્ર નવ પ્રાંતમાં રશિયાની આ મિસાઇલો અને ડ્રોન ત્રાટક્યા હતા, મોટાભાગના પાવર પ્લાન્ટ ટાર્ગેટ કરવામાં આવ્યા હતા, જેને કારણે ઇમર્જન્સી પાવર કટનો સામનો કરવો પડયો હતો. ખારકીવમાં રશિયન મિસાઇલ અને ડ્રોન ત્રાટકતા ૬૦ લોકો ઘાયલ થયા હતા, જ્યારે નેમીશલીઆનસ્કી જિલ્લામાં પણ હુમલામાં ચાર એપાર્ટમેન્ટની બિલ્ડિંગ અને વાહનોને ભારે નુકસાન થયું હતું, હુમલાને પગલે આ વિસ્તારમાં આવેલી હોસ્પિટલોને પણ નુકસાન થતા આશરે ૨૦૦ જેટલા દર્દીઓને અન્ય સ્થળે ખસેડવા પડયા હતા.
રશિયાના યુક્રેન પર બેફામ હુમલા વચ્ચે યુરોપના હજારો સૈનિકો પોલેન્ડમાં એક સૈન્ય અભ્યાસ કરવા જઇ રહ્યા છે. જેમાં યુદ્ધ પછીની સ્થિતિને પહોંચી વળવાની તાલીમ આપવામાં આવશે, જે સૈનિકોને તૈયાર કરવામાં આવશે તેમને બાદમાં યુક્રેનમાં તૈનાત કરવામાં આવી શકે છે. આ સૈનિકો યુક્રેનમાં રશિયાના હુમલામાં નાશ પામેલી ઇમારતો કે સુવિધાઓને ફરી તૈયાર કરવામાં મદદરૂપ થશે, જોકે તેઓને ખરેખર તૈનાત કરવામાં આવશે કે નહીં તેને લઇને નિષ્ણાતો શંકા વ્યક્ત કરી રહ્યા છે. બ્રિટન, ફ્રાન્સ મળીને કુલ ૩૭ જેટલા દેશો યુક્રેનને રશિયા સામે સમર્થન આપી રહ્યા છે.