નવી દિલ્હીઃવૈશ્વિક રાજકારણ અને સંરક્ષણ ક્ષેત્રે એક અત્યંત મોટા અને સનસનાટીભર્યા અહેવાલનો ધડાકો થયો છે! રશિયાના પ્રમુખ વ્લાદિમીર પુતિને ભારતને પોતાના સૌથી ઘાતક ફિફ્થ જનરેશન સ્ટીલ્થ ફાઈટર જેટ ‘Su-57’ અને અલ્ટ્રા-લોંગ રેન્જ હાઇપરસોનિક મિસાઈલો આપવાની ખુલ્લી ઑફર કરી દીધી છે. આ સાથે રશિયાએ કોઈપણ શરત વગર ભારતને સંપૂર્ણ ટેકનોલોજી ટ્રાન્સફર (તમામ સોર્સ કોડ્સ સાથે) કરવાની પણ તૈયારી દર્શાવી છે. દુશ્મન દેશોના રડારને પણ થાપ આપીને આકાશમાંથી કાળ બનીને ત્રાટકતા આ ઘાતક હથિયારો આગળ ચીન કે પાકિસ્તાનનું કોઈ બ્રહ્માસ્ત્ર કામ કરી શકે તેમ નથી! રશિયાની આ ઐતિહાસિક અને આક્રમક ઑફરથી બીજિંગ અને ઇસ્લામાબાદની ઊંઘ ઉડી ગઈ છે અને બંને દેશોના લશ્કરી વર્તુળોમાં ભારે ફફડાટ અને સન્નાટો વ્યાપી ગયો છે!

રશિયા દ્વારા અગાઉ સપ્લાય કરવામાં આવેલી S-400 સિસ્ટમે ભારતીય સૈન્યમાં શાનદાર દેખાવ કર્યો છે. 'ઓપરેશન સિંદૂર' દરમિયાન S-400 એ પાકિસ્તાની એરબોર્ન અર્લી વોર્નિંગ એરક્રાફ્ટને રેકોર્ડ અંતરે જ તોડી પાડ્યું હતું. આ જ સફળતાને ધ્યાનમાં રાખીને રશિયાએ વધુ 5 S-400 સ્ક્વોડ્રન આપવાની બિડ રજૂ કરી છે. તેની સાથે રશિયા આગામી પેઢીની S-500 સિસ્ટમ પણ આપવા માંગે છે. જોકે, ભારત માટે આ નિર્ણય જટિલ છે કારણ કે ભારતે પોતાના સ્વદેશી 'પ્રોજેક્ટ કુશ' (Project Kusha) અને બેલિસ્ટિક મિસાઇલ ડિફેન્સ પ્રોગ્રામમાં ભારે ટેકનોલોજીકલ રોકાણ કર્યું છે. આથી સ્વદેશી સિસ્ટમ તૈયાર થઈ રહી હોય ત્યારે S-500 ખરીદવું કે કેમ તે મોટો પ્રશ્ન છે.

ભારતીય વાયુસેના (IAF) હાલમાં ઘટતા ફાઇટર સ્ક્વોડ્રન અને સ્ટીલ્થ ફાઇટર જેટની અછતનો સામનો કરી રહી છે. ચીન પાસે 500 થી વધુ J-20 સ્ટીલ્થ જેટ છે અને પાકિસ્તાન પણ ચીન પાસેથી J-35 મેળવવાની તૈયારીમાં છે. આવી સ્થિતિમાં રશિયાએ Su-57 જેટ્સ ટેકનોલોજી ટ્રાન્સફર અને ભારતમા સ્થાનિક ઉત્પાદનની શરત સાથે ઓફર કર્યા છે. IAF આ પ્રસ્તાવને સ્વદેશી AMCA (એડવાન્સ્ડ મીડિયમ કોમ્બેટ એરક્રાફ્ટ) ન આવે ત્યાં સુધીના 'સ્ટોપગેપ' (કામચલાઉ) ઉકેલ તરીકે જોઈ રહ્યું છે. પરંતુ વિદેશી ફાઇટર ખરીદવાથી વિવિધ પ્રકારના વિમાનોના લોજિસ્ટિક્સ અને મેન્ટેનન્સનો બોજ પણ વધવાની શક્યતા છે.