તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ભારે કરી! પત્નીને ઠંડી લાગતી હતીઃ પતિએ ભીંસીને બાથ ભીડી તો પાંચ પાંસળીઓ તૂટી ગઈઃ દવાખાને દાખલ થવું પડયું
ચીનમાંથી સામે આવેલા એક ચોંકાવનારા કિસ્સાએ સૌને વિચારવા મજબૂર કરી દીધા
ઝિયાંગ્સૂ તા.૨૪: પતિ-પત્ની વચ્ચે પ્રેમ વ્યક્ત કરવાની સૌથી સામાન્ય રીત એ છે કે તેઓ એકબીજાને ગળે લગાવી વ્હાલ કરે છે. પણ ચીનમાંથી સામે આવેલા એક ચોંકાવનારા કિસ્સાએ સૌને વિચારવા મજબૂર કરી દીધા છે. રિપોર્ટમાં જણાવ્યા અનુસાર, પતિએ પોતાની પત્નીને જોરથી જકડીને ગળે લગાવી, જે બાદ તેને છાતીમાં દુખાવો થવા લાગ્યો. હોસ્પિટલમાં તપાસ કરતા માલૂમ પડ્યું કે, મહિલાની પાંચ પાંસળીઓ તૂટી ગઈ છે, જ્યારે એક અન્ય પાંસળીમાં તિરાડ પડી ગઈ છે. આ ઘટના બાદ હાડકાની મજબૂતી અને ઓસ્ટિયોપોરોસિસ એટલે કે હાડકા નબળા થવાની સમસ્યાને લઈ ચર્ચા શરૂ થઈ છે. આખરે એક સામાન્ય હગ આટલી ગંભીર ઈજાનું કારણ કેવી રીતે બની શકે છે અને કયા લોકોએ વધારે સાવધાની રાખવી જોઈએ.
મીડિયા રિપોર્ટ્સ અનુસાર, આ ઘટના ચીનના ઝિયાંગ્સૂ પ્રાંતની છે. મહિલાના પતિએ જણાવ્યું કે, તેની પત્નીને ઠંડી લાગી રહી હતી, એટલા માટે તે તેને ગળે લગાવવા માટે આગળ વધ્યો. પતિનો ઈરાદો પ્રેમ વ્યક્ત કરવાનો હતો. પણ ગળે લગાવતા જ મહિલાને અચાનક જોરદાર દુખાવો અનુભવાયો અને તે નીચે બેસી ગઈ. શરૂઆતમાં કદાચ તેને અંદાજો નહોતો કે ઈજા આટલી ગંભીર હોઈ શકે છે. મહિલાએ આખી રાત દુખાવો સહન કર્યો અને બીજા દિવસે હોસ્પિટલમાં તપાસ કરાવી. રિપોર્ટ્સ અનુસાર, છાતીના સી.ટી. સ્કેનમાં પાંચ પાંસળીઓમાં ફેક્ચર અને એક અન્ય પાંસળીમાં તિરાડ થઈ હોવાની પુષ્ટિ થઈ છે. કહેવાય છે કે ડોક્ટરે મહિલાના હાડકા નબળા હોવા અને તેના કારણે ઈજા થઈ હોવાનું કહ્યું છે. જો કે આ મામલો દરેક વ્યક્તિ સાથે સામાન્ય રીતે થવાની ઘટના નથી.
પાંસળીઓ છાતીના મહત્ત્વના અંગોની સુરક્ષા કરે છે. મોટા ભાગે સામાન્ય રીતે ગળે લગાવવા પર પાંસળીઓને નુકસાન નથી થતું. પણ જો કોઈ વ્યક્તિને અચાનક બહુ વધારે ભીંસીને પકડી લેવામાં આવે, છાતી પર વધારે પ્રેશર નાખવામાં આવે અથવા ગળે લગાવતી વખતે શરીરને જોરથી ઉપર ઉઠાવવામાં આવે તો પાંસળીઓ પર વધારે પ્રેશર પડી શકે છે. આવી સ્થિતિમાં ઈજા થવાનો ખતરો વધી શકે છે. ખાસ કરીને એ લોકોને કે જેમના હાડકા નબળા હોય છે, તેમને ઓસ્ટિયોપોરોસિસની સમસ્યા છે. આ સ્થિતિમાં હાડકાનું ઘનત્વ ઓછું થઈ જાય છે અને તે સામાન્યથી વધારે નાજુક થઈ જાય છે. આવા લોકોમાં મામૂલી ઈજા અથવા લો પ્રેશરથી પણ ફ્રેક્ચર થવાની આશંકા વધી જાય છે.
ઓસ્ટિયોપોરોસિસ હાડકા સાથે જોડાયેલી એક એવી સમસ્યા છે, જેમાં હાડકાનું ઘનત્વ અને મજબૂતી ઓછી થવા લાગે છે. ઘણી વાર તેના શરૂઆતી તબક્કામાં કોઈ સ્પષ્ટ લક્ષણ નથી દેખાતા. વ્યક્તિને આ સમસ્યાની ખબર ત્યારે પડે છે, જ્યારે તેને મામૂલી ઈજા લાગવા પર પણ ફ્રેક્ચર થઈ જાય છે. ઉંમર વધવી, કેલ્શિયમ અને વિટામિન ડીની કમી, શારીરિક ગતિવિધિઓનો અભાવ અને અમુક દવાઓના લાંબા સમય સુધી ઉપયોગથી હાડકાનું સ્વાસ્થ્ય પ્રભાવિત થઈ શકે છે. મેનોપોઝ બાદ મહિલાઓમાં પણ ઓસ્ટિયોપોરોસિસનો ખતરો વધી શકે છે. જો કે ખાલી આ ઘટનાના આધાર પર એવું ન કહી શકાય કે દરેક વ્યક્તિને ગળે લગાવવાથી પાંસળીઓ તૂટવાનો ખતરો રહેલો છે. આ મામલામાં મહિલાના હાડકાની સ્થિતિ મહત્ત્વની માનવામાં આવે છે.
(9:57 AM IST)
છેલ્લા 8 દિવસમાં સૌથી લોકપ્રિય 
