નવી દિલ્હી:અંતરિયાળ દરિયાઈ સીમાઓમાંથી એક અત્યંત સનસનાટીભર્યા, દિલધડક અને કાળજું કંપાવી દેતા સમાચાર સામે આવ્યા છે! ભારત નજીકના આંતરરાષ્ટ્રીય દરિયાઈ માર્ગ પરથી પસાર થઈ રહેલું અને ૩ અલગ-અલગ દેશોના ૨૨ જેટલા ક્રૂ સભ્યો ધરાવતું એક વિરાટ માલવાહક જહાજ દરિયાના અગાધ પાણીમાં અચાનક રહસ્યમય રીતે ગુમ થઈ જતાં ભારે હાહાકાર મચી ગયો છે!
ઓડિશાના પારાદીપ બંદરથી આશરે 240 નોટિકલ માઈલ દૂર ઊંડા સમુદ્રમાં ડૂબી ગયેલા માલવાહક જહાજ 'એમવી ઓશિયન વિનર' ને લઈને રહસ્ય વધુ ઘેરું બન્યું છે. આ જહાજ પર કુલ 24 ક્રૂ સભ્યો સવાર હતા, જેમાં 20 ચીની, 3 મ્યાનમાર અને 1 બાંગ્લાદેશી નાગરિક સામેલ હતા. તેમાંથી 2 લોકોને સુરક્ષિત બચાવી લેવાયા હતા, પરંતુ બાકીના 22 લોકોનો હજુ સુધી કોઈ પત્તો મળ્યો નથી. શોધખોળ દરમિયાન જહાજની એક લાઈફબોટ મળી આવી હતી, પરંતુ તે અંદરથી સાવ ખાલી નીકળતા નિરાશા સાંપડી હતી. તેમ છતાં બચાવ એજન્સીઓએ ઓપરેશન ચાલુ રાખ્યું છે અને ભારતીય તટરક્ષક દળે અન્ય વહાણો તેમજ આસપાસથી પસાર થતા મર્ચન્ટ જહાજોની મદદ લઈને સર્ચ ઓપરેશનનો વ્યાપ વધાર્યો છે.
લાપતા ક્રૂ સભ્યોની શોધ દરમિયાન તટરક્ષક દળનું જહાજ ICGS વરાડ સતત દરિયાઈ વિસ્તારમાં પેટ્રોલિંગ કરી રહ્યું હતું. આ દરમિયાન હવાઈ સર્વેલન્સ કરી રહેલા નૌકાદળના વિમાનને એક ઈમરજન્સી ડિસ્ટ્રેસ સિગ્નલ મળ્યો હતો. તેના આધારે તપાસ કરતા કોસ્ટ ગાર્ડના જહાજને એક ઈમરજન્સી બીકન મળી આવ્યું હતું, જે ડૂબેલા જહાજ 'એમવી ઓશિયન વિનર' સાથે જોડાયેલું હોવાની પુષ્ટિ થઈ હતી. આ સંકેત મળ્યા બાદ તે વિસ્તારમાં શોધખોળ વધુ તેજ કરવામાં આવી હતી.