નવી દિલ્હી: મધ્યપૂર્વમાં અત્યારે જે રીતે યુદ્ધના વાદળો ઘેરાયા છે, તેમાં અમેરિકા માટે અત્યંત માઠા સમાચાર સામે આવ્યા છે. ઈરાન સામે સીધા જંગની તૈયારી કરી રહેલા રાષ્ટ્રપતિ ડોનાલ્ડ ટ્રમ્પને તેમના સૌથી નજીકના સાથી ગણાતા ઈઝરાયલે મોટો ઝટકો આપ્યો છે. મળતી વિગતો મુજબ, ઈરાનની અંદર ઘૂસીને કરવામાં આવતા 'ગ્રાઉન્ડ ઓપરેશન'માં ઈઝરાયલની સેનાએ જોડાવાની સાફ ના પાડી દીધી છે. ઈઝરાયલના આ વલણને કારણે અમેરિકા હવે આ લડાઈમાં એકલું પડી ગયું હોય તેવું જણાય છે. અમેરિકી સૈનિકોના મોતના બદલામાં ટ્રમ્પ વળતો પ્રહાર કરવા મક્કમ છે, પરંતુ જમીની લડાઈમાં સાથી દેશોનો સાથ ન મળતા ટ્રમ્પની મુશ્કેલીઓ વધી ગઈ છે. બીજી તરફ, ઈરાન પોતાની મિસાઈલ ટેકનોલોજી અને ભૌગોલિક સ્થિતિનો ફાયદો ઉઠાવીને અમેરિકાને પડકાર ફેંકી રહ્યું છે. જો અમેરિકા એકલે હાથે ઈરાનમાં પગ મૂકશે, તો મોટા પાયે જાનહાનિ થવાની ભીતિ છે, જેના કારણે પેન્ટાગોનમાં પણ ચિંતાનો માહોલ છે.

નિષ્ણાતોના મતે, ઈઝરાયલનું આ વલણ વ્યૂહાત્મક કારણોસર હોઈ શકે છે. જો ઈઝરાયલ સીધું જ આ જમીની યુદ્ધમાં ઝંપલાવે, તો સમગ્ર મધ્ય પૂર્વ ક્ષેત્રમાં તણાવ અત્યંત ભયાનક થઈ શકે છે. આ ઉપરાંત, ઈઝરાયલ હાલમાં પોતાની આંતરિક સુરક્ષાના પડકારોનો સામનો કરી રહ્યું છે, તેથી તે ઈરાન જેવા મજબૂત દેશ સામેના મોટા યુદ્ધમાં સીધી રીતે સામેલ થવાનું ટાળી રહ્યું છે. જોકે, એ હજુ સ્પષ્ટ નથી થયું કે ઈઝરાયલ સૈન્ય મદદ સિવાય અન્ય કોઈ રીતે, જેમ કે ગુપ્ત માહિતી કે ટેકનિકલ સહયોગ દ્વારા અમેરિકાને મદદ કરશે કે કેમ.બીજી તરફ, અમેરિકાએ પશ્ચિમ એશિયામાં પોતાના સૈનિકો, યુદ્ધ જહાજો અને ફાઇટર જેટ્સની સંખ્યામાં નોંધપાત્ર વધારો કરીને દબાણ બનાવવાની વ્યૂહરચના અપનાવી છે. પેન્ટાગોને ઈરાન વિરુદ્ધ સંભવિત જમીની કામગીરી માટેના વિવિધ વિકલ્પો પર કામ શરૂ કરી દીધું છે, પરંતુ ડોનાલ્ડ ટ્રમ્પ કે અમેરિકન વહીવટીતંત્ર દ્વારા હજુ સુધી સૈનિકો ઉતારવા અંગેનો કોઈ અંતિમ નિર્ણય લેવામાં આવ્યો નથી. કોઈ મોટા સહયોગી વિના ઈરાન જેવા દેશમાં જમીની યુદ્ધ લડવું અમેરિકા માટે સૈન્ય અને રાજકીય એમ બંને સ્તરે મોટું જોખમ સાબિત થઈ શકે છે.