નવી દિલ્હી: અમેરિકાના પ્રમુખ ડોનાલ્ડ ટ્રમ્પે જાહેરાત કરી છે કે તે ટૂંક સમયમાં રશિયાના પ્રમુખ વ્લાદિમીર પુતિનને બુડાપેસ્ટ, હંગેરીમાં મળશે. આ મુલાકાતનો મુખ્ય ઉદ્દેશ્ય રશિયા અને યુક્રેન વચ્ચે ચાલી રહેલા યુદ્ધનો અંત લાવવાનો હોવાનું ટ્રમ્પે જણાવ્યું છે. પુતિન સાથેની વાતચીત બાદ ટ્રમ્પે યુક્રેનના પ્રમુખ વોલોડીમીર ઝેલેન્સકીને પણ અમેરિકા આવવાનું આમંત્રણ આપ્યું છે. અમેરિકાના પ્રમુખ ડોનાલ્ડ ટ્રમ્પે સોશિયલ મીડિયા પ્લેટફોર્મ 'ટ્રુથ' પર પોસ્ટ કરીને આ મુલાકાતની જાહેરાત કરી હતી. તેમણે લખ્યું, 'રશિયાના પ્રમુખ વ્લાદિમીર પુતિન અને હું મળીશું. સ્થળ પર સંમતિ સધાઈ ગઈ છે. અમે બુડાપેસ્ટ, હંગેરીમાં મળીશું. ચાલો જોઈએ કે અમે રશિયા અને યુક્રેન વચ્ચેના યુદ્ધનો અંત લાવી શકીએ છીએ કે નહીં.'

ટ્રમ્પે પુતિન સાથેની ફોન વાતચીતને 'ખૂબ જ સકારાત્મક' ગણાવી હતી અને કહ્યું હતું કે મધ્ય એશિયામાં મળેલી સફળતા યુક્રેનમાં પણ શાંતિ સ્થાપિત કરવામાં મદદરૂપ થશે. બંને નેતાઓએ રશિયા અને યુનાઇટેડ સ્ટેટ્સ વચ્ચેના વેપાર અંગે પણ ચર્ચા કરી હતી, જેના માટે બંને દેશોના પ્રતિનિધિમંડળો આવતા સપ્તાહે મળશે. અગાઉ અલાસ્કામાં થયેલી વાટાઘાટોનું કોઈ સકારાત્મક પરિણામ આવ્યું નહોતું.

પુતિન સાથેની વાતચીત બાદ તરત જ ટ્રમ્પે યુક્રેનના પ્રમુખ ઝેલેન્સકીને પણ ફોન કરીને યુનાઇટેડ સ્ટેટ્સ આવવાનું આમંત્રણ આપ્યું છે. ટ્રમ્પનો આ અભિગમ ઝેલેન્સકી પ્રત્યે અગાઉ કરતાં વધુ ઉદાર હોવાનું માનવામાં આવે છે. બીજી તરફ, પુતિનના નજીકના સહયોગી યુરી ઉષાકોવે જણાવ્યું કે, 'ટ્રમ્પ સાથેની વાતચીત દરમિયાન પુતિને યુક્રેનને ટોમાહોક મિસાઇલો મોકલવાના મુદ્દે ચિંતા વ્યક્ત કરી હતી. પુતિને કહ્યું કે આ મિસાઇલો મોકલવાથી રશિયા અને અમેરિકા વચ્ચેના કરારોનું ઉલ્લંઘન થાય છે. આ મિસાઇલો યુદ્ધભૂમિ પરની પરિસ્થિતિ બદલશે નહીં, પરંતુ બંને દેશો વચ્ચેના સંબંધોને વધુ ખરાબ કરશે.'