નવી દિલ્હી: 2022થી ચાલી રહેલા યુક્રેન-રશિયા યુદ્ધમાં આજે ફરીથી તીવ્રતા જોવા મળી છે. રશિયાએ યુક્રેનના દરિયાકાંઠાના શહેર ઓડેસામાં સ્થિત એક મહત્વપૂર્ણ ગેસ પ્રોસેસિંગ ફેસિલિટી પર મિસાઇલ હુમલો કર્યો છે. આ હુમલાથી અનેક પાઇપલાઇન્સ અને ઉર્જા વ્યવસ્થાને ભારે નુકસાન થયું છે.

ઝેલેન્સ્કીએ આંતરરાષ્ટ્રીય સમુદાયને રશિયા સામે તાકીદે કડક પગલાં લેવા અપીલ પણ કરી છે. જોકે, આ હુમલાની સાથે એક મહત્વપૂર્ણ રાજનૈતિક ઘટના પણ બની છે. અમેરિકાના ખાસ શાંતિદૂત સ્ટીવ વિટકોફ મોસ્કો ગયા છે અને રશિયન રાષ્ટ્રપતિ વ્લાદિમીર પુતિન સાથે બેઠક કરી છે. અધિકારીઓનું કહેવું છે કે આ બેઠક શાંતિપ્રક્રિયા માટે પ્રારંભિક પ્રયાસ છે.

સૂત્રોના જણાવ્યા મુજબ, બંને તરફથી "સીમિત શસ્ત્રવિરામ" માટે ચર્ચા ચાલી રહી છે, ખાસ કરીને ઓડેસા અને ડોનેત્સ્કના કેટલાક વિસ્તારોમાં. રશિયા હવે શિયાળાની સીઝનમાં યુક્રેનની ઊર્જા વ્યવસ્થા તોડીને સામાન્ય જનતા પર દબાણ લાવવાનો પ્રયાસ કરી રહ્યું છે – જેથી યુક્રેનના આંતરિક રાજકારણ અને લોકોમાં અસંતોષ ઊભો થાય.