લંડન તા. ૨૫ : પોતાના ખુલાસાથી સમગ્ર વિશ્વમાં હલચલ મચાવનાર ઈન્‍વેસ્‍ટિગેટિવ વેબસાઈટ વિકિલીક્‍સના સ્‍થાપક જુલિયન અસાંજે ૧૯૦૧ દિવસ જેલમાં રહ્યા બાદ આખરે મુક્‍ત થઈ ગયા છે. તેને બ્રિટનની બેલમાર્શ જેલમાંથી મુક્‍ત કરવામાં આવ્‍યા હતા. અસાંજે ૨૦૧૦માં અફઘાનિસ્‍તાન અને ઇરાકમાં યુએસ સૈન્‍ય કાર્યવાહીથી સંબંધિત હજારો વર્ગીકૃત દસ્‍તાવેજો લીક કર્યા હતા. અમેરિકાના ઈતિહાસમાં તે સૌથી મોટો લીક હતો, જેણે સમગ્ર અમેરિકાને હચમચાવી નાખ્‍યું હતું.

ઓસ્‍ટ્રેલિયન નાગરિક જુલિયન અસાંજેની ૨૦૧૦માં પહેલીવાર ધરપકડ કરવામાં આવી હતી. અસાંજે પર જાતીય શોષણનો આરોપ હતો અને તે બ્રિટનમાં હતો. તેથી સ્‍વીડિશ સત્તાવાળાઓએ બ્રિટિશ સરકારને અસાંજેને જાતીય શોષણના આરોપો અંગે પૂછપરછ કરવા માટે પ્રત્‍યાર્પણ કરવા જણાવ્‍યું હતું. જો કે, ઘટનાઓના નાટકીય વળાંકમાં, અસાંજે લંડનમાં એક્‍વાડોર દૂતાવાસમાં ભાગી ગયો અને સ્‍વીડનમાં પ્રત્‍યાર્પણ ટાળવા માટે ત્‍યાં આશરો લીધો.

રાજદ્વારી આશ્રયને કારણે લંડન પોલીસ એમ્‍બેસીમાં પ્રવેશી શકી ન હતી. જુલિયન અસાંજે લગભગ ૭ વર્ષ સુધી ઇક્‍વાડોર એમ્‍બેસીમાં રહ્યો અને અંતે વર્ષ ૨૦૧૯માં અસાંજેને ત્‍યાંથી કાઢી મૂકવામાં આવ્‍યો. ઇક્‍વાડોર એમ્‍બેસીમાંથી બહાર આવતાની સાથે જ બ્રિટિશ પોલીસે તેની ધરપકડ કરી અને જેલમાં ધકેલી દીધો.

લંડનની બેલમાર્શ જેલમાં રહેતા જુલિયન અસાંજે તેની મિત્ર સ્‍ટેલા સાથે લગ્ન પણ કર્યા હતા. બંનેને બે બાળકો પણ છે. અમેરિકન દસ્‍તાવેજો લીક કરવાના કેસમાં અસાંજેને અમેરિકન કોર્ટે ૩૫ વર્ષની સજા સંભળાવી હતી. જોકે, ૨૦૧૭માં તત્‍કાલિન રાષ્ટ્રપતિ બરાક ઓબામાએ તેમની સજા ઘટાડીને ૭ વર્ષની કરી હતી. જોકે, અમેરિકા અને ઓસ્‍ટ્રેલિયા વચ્‍ચેના કરારને કારણે તે હવે પોતાના દેશમાં પરત જઈ શકશે.