ગાંધીનગર, તા. 27  :  ગુજરાતમાં આ વર્ષે ચોમાસાની શરૂઆત અત્યંત નબળી રહી છે. વરસાદના આંકડા ચોંકાવનારા સામે આવ્યા છે. રાજ્યમાં છેલ્લા 10 વર્ષમાં સૌથી ઓછો વરસાદ નોંધાયો છે, જેના કારણે ખેડૂતો સહિત તંત્રની ચિંતા વધી ગઈ છે.

હવામાન વિભાગના આંકડા મુજબ, 27 જૂન 2026 સુધીમાં રાજ્યમાં સરેરાશ માત્ર 2.5% જેટલો જ વરસાદ નોંધાયો છે. સૌરાષ્ટ્ર અને કચ્છ ઝોનમાં સ્થિતિ વધુ ગંભીર છે. રાજ્યના અનેક જિલ્લાઓ હજુ પણ સંપૂર્ણપણે કોરા છે, જ્યારે કેટલાક જિલ્લાઓમાં છૂટોછવાયો વરસાદ પડ્યો છે.

ઝોન વાઇઝ સ્થિતિ.કચ્છ: 0.5% કરતા પણ ઓછો વરસાદ,ઉત્તર ગુજરાત: 1.2% વરસાદ,મધ્ય ગુજરાત: 2.8% વરસાદ,દક્ષિણ ગુજરાત 4.1% વરસાદ - સૌથી વધુ,સૌરાષ્ટ્ર: 1.9% વરસાદ.

ચોમાસું મોડું બેસવાને કારણે ખરીફ પાકની વાવણી હજુ શરૂ થઈ શકી નથી. ખેડૂતો આકાશ તરફ મીટ માંડીને વરસાદની રાહ જોઈ રહ્યા છે. જો આવનારા દિવસોમાં સારો વરસાદ નહીં થાય તો ખેતી અને પીવાના પાણીની સમસ્યા સર્જાઈ શકે છે.

જોકે હવામાન વિભાગે રાહતના સમાચાર આપ્યા છે. વિભાગની આગાહી મુજબ, 1 જુલાઈથી રાજ્યમાં વરસાદી સિસ્ટમ સક્રિય થશે અને 2-3 જુલાઈથી સાર્વત્રિક વરસાદની શક્યતા છે. બંગાળની ખાડીમાં સર્જાયેલી સિસ્ટમના કારણે દક્ષિણ ગુજરાત અને સૌરાષ્ટ્રમાં સારો વરસાદ પડી શકે છે.

કૃષિ વિભાગે પણ ખેડૂતોને અપીલ કરી છે કે પૂરતો વરસાદ થયા બાદ જ વાવણી કરવી. તંત્ર ડેમ અને જળાશયોની સ્થિતિ પર નજર રાખી રહ્યું છે.