રાજકોટઃ રાજ્‍યમાં મેઘરાજાની તોફાની બેટિંગ યથાવત છે અને આગામી દિવસોમાં પણ અનેક જિલ્લાઓમાં વરસાદનું જોર ચાલુ રહેવાની શકયતા છે. ભારતીય હવામાન વિભાગ (આઇએમડી) અને વિભિન્ન રાષ્‍ટ્રીય તેમજ સ્‍થાનિક અખબારી અહેવાલો અનુસાર, ખાસ કરીને દક્ષિણ ગુજરાતના નવસારી, વલસાડ અને ડાંગ જિલ્લામાં ભારેથી અતિભારે વરસાદ (રેડ એલર્ટ) પડી શકે છે. આ વિસ્‍તારોમાં જમીન પાણીથી તરબતર હોવાથી અને નીચાણવાળા વિસ્‍તારોમાં અચાનક પૂર (ફ્‌લેશ ફ્‌લડ) આવવાના જોખમને પગલે સ્‍થાનિક વહીવટી તંત્રને અત્‍યંત સતર્ક (એલર્ટ) રાખવામાં આવ્‍યું છે.

આજે ૮ જુલાઈના રોજ અમરેલી, ભાવનગર, સુરત, તાપી, નર્મદા, છોટા ઉદેપુર અને દાહોદ જિલ્લામાં ભારે વરસાદ (ઓરેન્‍જ અને યલો એલર્ટ) ની આગાહી છે. જ્‍યારે દેવભૂમિ દ્વારકા, પોરબંદર, જૂનાગઢ, ગીર સોમનાથ, રાજકોટ, જામનગર, મોરબી, બોટાદ, સુરેન્‍દ્રનગર, અમદાવાદ, આણંદ, ભરૂચ, વડોદરા, પંચમહાલ, મહીસાગર, ખેડા, કચ્‍છ, ગાંધીનગર, અરવલ્લી, સાબરકાંઠા, મહેસાણા, પાટણ, બનાસકાંઠા તેમજ વાવ-થરાદ તાલુકામાં હળવાથી મધ્‍યમ વરસાદ થઈ શકે છે.

હવામાન વિભાગના સત્તાવાર અનુમાન મુજબ, ૯ જુલાઈથી ૧૩ જુલાઈ દરમિયાન પણ રાજ્‍યમાં વરસાદી માહોલ યથાવત રહેવાની પૂરેપૂરી શકયતા છે. આ સમયગાળા દરમિયાન તાપી, નવસારી, ડાંગ અને વલસાડ જિલ્લામાં ભારે વરસાદ પડી શકે છે. જ્‍યારે સુરત, નર્મદા, ભરૂચ, વડોદરા, છોટા ઉદેપુર, દાહોદ, પંચમહાલ, મહીસાગર, ખેડા, આણંદ, અમદાવાદ, ગાંધીનગર, મહેસાણા, પાટણ, બનાસકાંઠા, સાબરકાંઠા, અરવલ્લી, વાવ-થરાદ, કચ્‍છ, મોરબી, સુરેન્‍દ્રનગર, બોટાદ, ભાવનગર, અમરેલી, ગીર સોમનાથ, જૂનાગઢ, દેવભૂમિ દ્વારકા, પોરબંદર, જામનગર અને રાજકોટ જિલ્લામાં છૂટાછવાયા સ્‍થળોએ ગાજવીજ સાથે હળવાથી મધ્‍યમ વરસાદ થઈ શકે છે.

વરસાદની સાથે કેટલાક વિસ્‍તારોમાં ૪૦ થી ૫૦ કિલોમીટર પ્રતિ કલાકની ઝડપે તોફાની પવન ફૂંકાવાની શકયતા છે. ઇન્‍ડિયન નેશનલ સેન્‍ટર ફોર ઓશન ઇન્‍ફોર્મેશન સર્વિસિસ (ઇન્‍કોઇસ) દ્વારા દરિયામાં ૩.૨ થી ૩.૫ મીટર ઊંચા મોજા ઉછળવાની ‘હાઇ વેવ' ચેતવણી આપવામાં આવી છે, જેને પગલે માછીમારોને દરિયો ન ખેડવા માટે કડક સૂચના અપાઈ છે. ગાંધીનગર સ્‍થિત સ્‍ટેટ ઇમર્જન્‍સી ઓપરેશન સેન્‍ટર (એસઇઓસી), જળાશય વિભાગ, અને વીજ કંપની (પીજીવીસીએલ) ના અધિકારીઓને કોઈપણ આપાતકાલીન સ્‍થિતિ, રસ્‍તા બંધ થવા કે વીજળી જવા જેવી સમસ્‍યાઓને પહોંચી વળવા સ્‍ટેન્‍ડબાય મોડમાં રાખવામાં આવ્‍યા છે