​વડોદરા: શિક્ષણના પવિત્ર ધામ ગણાતી મહારાજા સયાજીરાવ યુનિવર્સિટી (MSU) ફરી એકવાર શૈક્ષણિક ગરિમાને લજવતા બનાવોને લઈને ચર્ચામાં આવી છે. યુનિવર્સિટીના સાયન્સ ફેકલ્ટી કેમ્પસમાં આજે વિદ્યાર્થી સંગઠનો એબીવીપી (ABVP) અને એનએસયુઆઈ (NSUI) ના કાર્યકરો વચ્ચે થયેલી મારામારીએ હિંસક સ્વરૂપ ધારણ કર્યું હતું. આ ઘટનાને કારણે કેમ્પસમાં લાંબા સમય સુધી તંગદિલીભર્યો માહોલ છવાયેલો રહ્યો હતો.

​સૂત્રોના જણાવ્યા અનુસાર, સાયન્સ ફેકલ્ટીના પરિસરમાં આજે કોઈ સામાન્ય મુદ્દાને લઈને બંને વિદ્યાર્થી સંગઠનોના કાર્યકરો વચ્ચે બોલાચાલી થઈ હતી. જોકે, થોડી જ વારમાં આ વિવાદ એટલો વકર્યો કે બંને પક્ષો સામસામે આવી ગયા હતા. મામલો એટલી હદે બિચક્યો કે એક વિદ્યાર્થી નેતાએ સામેના પક્ષના કાર્યકરને જાહેરમાં લાફો મારી દેતા સ્થિતિ કાબૂ બહાર ગઈ હતી.

​હિંસક પથ્થરમારો અને અફરાતફરી:

ઝપાઝપી અને મારામારીની આ ઘટના માત્ર હાથોહાથની લડાઈ સુધી સીમિત ન રહી, પરંતુ તેમાં પથ્થરમારો પણ થયો હોવાનું સામે આવ્યું છે. આ અચાનક થયેલા હિંસક હુમલામાં બે વિદ્યાર્થીઓને ઈજાઓ પહોંચી છે. ઘટનાના પગલે કેમ્પસમાં હાજર અન્ય વિદ્યાર્થીઓમાં ભારે ફફડાટ વ્યાપી ગયો હતો અને આખું કેમ્પસ દોડધામના દ્રશ્યોથી ભરાઈ ગયું હતું. હિંસક ઘટના બાદ એનએસયુઆઈના કાર્યકરો સ્થળ પરથી તરત જ ફરાર થઈ ગયા હતા.

​સત્તાવાળાઓ સામે કડક કાર્યવાહીની માંગ:

ઘટના બાદ એબીવીપીના વિદ્યાર્થીઓએ એકત્ર થઈને આખા બનાવ અંગે સાયન્સ ફેકલ્ટીના ડીનને લેખિતમાં ફરિયાદ નોંધાવી છે. વિદ્યાર્થી નેતાઓની આ પ્રકારની ગુંડાગર્દી અને વારંવાર બનતી આવી હિંસક ઘટનાઓને લઈને હવે યુનિવર્સિટીના વહીવટીતંત્ર સામે ગંભીર સવાલો ઉઠી રહ્યા છે. યુનિવર્સિટીમાં અભ્યાસ કરવા આવતા નિર્દોષ વિદ્યાર્થીઓની સુરક્ષા અને શૈક્ષણિક માહોલ જાળવી રાખવા માટે યુનિવર્સિટી સત્તાવાળાઓ હવે શું નક્કર પગલાં ભરે છે, તે જોવું રહ્યું. સ્થાનિક સ્તરે આ ઘટનાને લઈને ભારે રોષ જોવા મળી રહ્યો છે અને દોષિતો સામે કાયદેસરની કડક કાર્યવાહીની માંગ પ્રબળ બની છે.