દિવાળીના તહેવારોને ધ્યાનમાં રાખીને વડોદરા પોલીસ સંપૂર્ણપણે એક્શન મોડમાં આવી ગઈ છે. તહેવારો દરમિયાન શહેરમાં કાયદો અને વ્યવસ્થા જળવાઈ રહે તથા કોઈ અનિચ્છનીય ઘટના ન ઘટે તે માટે પોલીસ દ્વારા સંવેદનશીલ અને ભીડભાડવાળા વિસ્તારોમાં સઘન ચેકિંગ હાથ ધરવામાં આવ્યું છે.

શહેરના સૌથી વ્યસ્ત અને ભીડભાડવાળા વિસ્તાર ગણાતા મંગળ બજારમાં પોલીસે ખાસ સઘન તપાસ હાથ ધરી હતી. આ સુરક્ષા અભિયાનમાં સુરક્ષા વ્યવસ્થાને વધુ મજબૂત બનાવવા માટે ડોગ સ્ક્વોડ (Dog Squad) અને બોમ્બ સ્ક્વોડને પણ સામેલ કરવામાં આવ્યા હતા. આ ઉપરાંત, આકાશમાંથી નજર રાખવા અને સુરક્ષાનું નિરીક્ષણ કરવા માટે ડ્રોનનો પણ ઉપયોગ કરવામાં આવ્યો હતો.

તહેવારોની ખરીદી માટે બજારોમાં ઉમટી રહેલી ભારે ભીડને ધ્યાનમાં રાખીને વડોદરા પોલીસે નાગરિકોને ખાસ સાવચેત રહેવા અપીલ કરી છે. બજારોમાં અવરજવર કરતી વખતે પોતાના કિંમતી સામાન, પર્સ અને દાગીનાની વિશેષ કાળજી રાખવા તેમજ કોઈપણ શંકાસ્પદ વસ્તુ કે વ્યક્તિ જણાય તો તુરંત પોલીસને જાણ કરવા સૂચના આપવામાં આવી છે