વડોદરા કોંગ્રેસના કોર્પોરેટર આશિષ જોશીની અમદાવાદથી ધરપકડ કરવામાં આવી છે. અમદાવાદની રામોલ પોલીસે આ કાર્યવાહી કરી છે.  આ કાર્યવાહી બાદ રાજકારણમાં ખળભળાટ મચ્યો છે.

મળતી માહિતી મુજબ, ચૂંટણી દરમિયાન દારૂ પકડાવાના એક જૂના કેસમાં આશિષ જોશીની સંડોવણી હોવાનું બહાર આવતા પોલીસે તેમની અટકાયત કરી છે. આ મામલે અગાઉ છોટાઉદેપુર જિલ્લાના સંખેડા પોલીસ સ્ટેશનમાં ગુનો દાખલ કરવામાં આવ્યો હતો, જેની તપાસના આધારે પોલીસે આ આકરી કાર્યવાહી કરી છે.

ધરપકડ બાદ રામોલ પોલીસે આશિષ જોશીને કાયદેસરની પ્રક્રિયા પૂર્ણ કરી નામદાર કોર્ટ સમક્ષ હાજર કર્યા હતા. કોર્ટ કાર્યવાહી દરમિયાન તપાસ અધિકારીએ કેસની ઊંડાણપૂર્વક તપાસ કરવા અને અન્ય કડીઓ મેળવવા માટે આરોપીના ત્રણ દિવસના રિમાન્ડની માંગણી કરી હતી. પોલીસ પક્ષે દલીલ કરી હતી કે ચૂંટણી સમયે દારૂના જથ્થાના નેટવર્ક પાછળ કોણ છે અને આ વ્યવહારમાં અન્ય કોની સંડોવણી છે તે જાણવું અત્યંત જરૂરી છે.

બીજી તરફ, આશિષ જોશીના વકીલે રિમાન્ડની માંગણીનો વિરોધ કર્યો હતો. બંને પક્ષોની લાંબી દલીલો સાંભળ્યા બાદ, નામદાર કોર્ટે પોલીસની દલીલોને ગ્રાહ્ય રાખી હતી. જોકે, કોર્ટે ત્રણ દિવસના બદલે આવતીકાલે બપોરે 3:00 વાગ્યા સુધીના રિમાન્ડ મંજૂર કર્યા છે. હવે પોલીસ આ સમયગાળા દરમિયાન આશિષ જોશીની પૂછપરછ કરશે અને આ કેસમાં કયા મોટા માથાઓ સામેલ છે તેની વિગતો એકત્રિત કરવાનો પ્રયાસ કરશે.

આ ઘટનાને પગલે વડોદરા અને અમદાવાદના રાજકીય વર્તુળોમાં ભારે ચર્ચા જાગી છે. કોંગ્રેસના સક્રિય નેતા અને કોર્પોરેટરની દારૂના કેસમાં ધરપકડ થતા વિરોધ પક્ષ અને સત્તાધારી પક્ષ વચ્ચે નિવેદનબાજી શરૂ થઈ ગઈ છે. ખાસ કરીને ચૂંટણી ટાણે થયેલી આ કાર્યવાહીને કારણે આગામી દિવસોમાં આ મામલો વધુ ગરમાય તેવી શક્યતા છે. પોલીસ હવે આ કેસમાં આશિષ જોશીના મોબાઈલ રેકોર્ડ અને સંપર્કોની પણ તપાસ કરી રહી છે. આ કેસમાં મોટા ખુલાસા થઈ શકે છે.