વડોદરા : કેન્દ્રીય જળશક્તિ મંત્રી સી.આર. પાટીલ હાલ ગુજરાતના પ્રવાસે છે, જ્યાં તેઓ સતત રાજકીય બેઠકોની સાથે આપત્તિ વ્યવસ્થાપનની કામગીરી પર પણ સીધી નજર રાખી રહ્યા છે. પોતાના આ પ્રવાસ દરમિયાન તેમણે વડોદરા અને નવસારી જિલ્લાની મહત્વપૂર્ણ મુલાકાતો લીધી હતી. વડોદરામાં યોજાનારી આગામી પેટાચૂંટણીનો તાગ મેળવવા માટે તેમણે માંજલપુર વિધાનસભા બેઠકની બૃહદ કાર્યકર્તા બેઠકમાં હાજરી આપી હતી અને પાર્ટીના હોદ્દેદારો તેમજ કાર્યકર્તાઓમાં નવો ઉત્સાહ પૂર્યો હતો.

બેઠક દરમિયાન કેન્દ્રીય મંત્રીએ માંજલપુરના ભાજપના દિવંગત ધારાસભ્ય સ્વ. યોગેશ પટેલને વિનમ્ર શ્રદ્ધાંજલિ અર્પણ કરી હતી. તેમણે કાર્યકર્તાઓને સંબોધતા ભાવુક અપીલ કરી હતી કે, માંજલપુર બેઠક પર ભાજપની ઐતિહાસિક લીડ જાળવી રાખવી અને ચૂંટણીમાં પ્રચંડ વિજય મેળવવો એ જ સ્વ. યોગેશ પટેલને સાચી શ્રદ્ધાંજલિ હશે. તેમણે તમામ સ્થાનિક નેતાઓ અને કાર્યકર્તાઓને અત્યારથી જ ચૂંટણી લક્ષી તૈયારીઓમાં પૂરા જોશથી લાગી જવા માટે માર્ગદર્શન આપ્યું હતું.

વડોદરાની રાજકીય બેઠકો પૂર્ણ કર્યા બાદ સી.આર. પાટીલે નવસારી જિલ્લાના પૂરગ્રસ્ત વિસ્તારોમાં પહોંચીને જમીની હકીકતની સમીક્ષા પણ કરી હતી. તેમણે પૂરની સ્થિતિથી અસરગ્રસ્ત થયેલા વિસ્તારોની મુલાકાત લઈને રાહત અને બચાવ કાર્યો અંગે સ્થાનિક તંત્ર સાથે ચર્ચા કરી હતી તેમજ પ્રભાવિત લોકોને તમામ શક્ય મદદ પહોંચાડવાની ખાતરી આપી હતી.