સુરત, તા. 26 : સુરતના મંદારવાજા બ્રિજ પર આજે બપોરે એક ટ્રક હાઈટ ગેજ સાથે અથડાતા ફસાઈ ગયો હતો. ટ્રકમાં રહેલું ઓઈલ ટેન્કર ફાટી જતા રોડ પર મોટા પ્રમાણમાં ઓઈલ લીકેજ થયું હતું. ઓઈલ ફેલાતા બ્રિજ પર વાહનો લપસી પડે તેવી સ્થિતિ સર્જાતા અફરાતફરી મચી ગઈ હતી. 

ઘટનાની જાણ થતા જ ફાયર બ્રિગેડની ટીમ તાત્કાલિક સ્થળ પર પહોંચી હતી. ફાયરના જવાનોએ સમયસૂચકતા વાપરીને સમગ્ર રોડ પર કેમિકલ પાઉડર નાખી ઓઈલ સાફ કર્યું હતું. સાથે જ ફસાયેલા ટ્રકને ક્રેનની મદદથી હટાવવામાં આવ્યો હતો. ફાયર બ્રિગેડની કામગીરીના કારણે કોઈ મોટી દુર્ઘટના કે જાનહાનિ થતા બચી ગઈ હતી. આ ઘટનાના કારણે બ્રિજ પર એક કલાક સુધી ટ્રાફિક બંધ રહ્યો હતો.