અમદાવાદ, તા. ૨૮ : બંગાળની ખાડીના ‘અર્નબ' વાવાઝોડા અને બદલાતી હવામાન પ્રણાલીઓ વચ્‍ચે ગુજરાતમાં બેવડી ઋતુનો અનુભવ થઈ રહ્યો છે. રાજકોટમાં સામાન્‍ય કરતાં ૩.૫ ડિગ્રી વધુ તાપમાન નોંધાયું છે. બીજી તરફ કચ્‍છના નલિયામાં લઘુત્તમ તાપમાન ૧૮.૬ ડિગ્રી નોંધાયું છે. હવે આગામી બે દિવસ દક્ષિણ ગુજરાત તથા સૌરાષ્‍ટ્રના કેટલાક ભાગોમાં કમોસમી વરસાદની આગાહી છે. આગામી ૪૮ કલાક બાદ મહત્તમ તાપમાનમાં ૨થી ૩ ડિગ્રીનો ઘટાડો થવાની સંભાવના છે.

ગુજરાતમાં ઓક્‍ટોબર મહિનાના અંતિમ દિવસોમાં હવામાનના બદલાતા મિજાજથી લોકો આﾍર્યચકિત થઈ રહ્યા છે. એક તરફ રાજકોટ સહિત સૌરાષ્‍ટ્રમાં આકરી ગરમી પડી રહી છે, તો બીજી તરફ કચ્‍છ અને સૌરાષ્‍ટ્રના કેટલાક વિસ્‍તારોમાં રાત્રે તથા વહેલી સવારે ઠંડીનો ચમકારો અનુભવાઈ રહ્યો છે. આ દરમિયાન હવામાન વિભાગે આવતીકાલથી એટલે કે ૨૯ અને ૩૦ ઓક્‍ટોબરે દક્ષિણ ગુજરાત અને સૌરાષ્‍ટ્રના કેટલાક જિલ્લાઓમાં હળવા વરસાદ અથવા ગાજવીજ સાથે વરસાદી ઝાપટાં પડવાની આગાહી કરતાં ફરી માવઠાની શકયતા ઊભી થઈ છે.

ભારતીય હવામાન વિભાગના અમદાવાદ કેન્‍દ્ર દ્વારા ૨૭ ઓક્‍ટોબરની સાંજે જાહેર કરાયેલા સત્તાવાર બુલેટિન મુજબ, ૨૯ ઓક્‍ટોબરે નવસારી, વલસાડ, દમણ તથા દાદરા અને નગરહવેલીમાં છૂટાછવાયા સ્‍થળોએ હળવો વરસાદ પડી શકે છે. જ્‍યારે ૩૦ ઓક્‍ટોબરે આ વિસ્‍તારો ઉપરાંત સૌરાષ્‍ટ્રના અમરેલી અને ભાવનગર જિલ્લામાં પણ વરસાદી ઝાપટાંની સંભાવના દર્શાવવામાં આવી છે. અન્‍ય મોટા ભાગના વિસ્‍તારોમાં વાતાવરણ સૂકું રહેવાની શકયતા છે.

રાજ્‍યમાં ગઇકાલે રાજકોટ ૩૯.૩ ડિગ્રી મહત્તમ તાપમાન સાથે સૌથી ગરમ શહેર રહ્યું હતું. રાજકોટનું તાપમાન સામાન્‍ય કરતાં ૩.૫ ડિગ્રી ઊંચું નોંધાયું હતું. પોરબંદરમાં ૩૮.૩, ભુજ, નલિયા, જૂનાગઢ અને કેશોદમાં ૩૮, સુરતમાં ૩૭.૫, સુરેન્‍દ્રનગરમાં ૩૭.૩, ગાંધીનગરમાં ૩૬.૫, વડોદરામાં ૩૬.૨, અમદાવાદ અને અમરેલીમાં ૩૬.૧ તથા ભાવનગરમાં ૩૫.૮ ડિગ્રી મહત્તમ તાપમાન નોંધાયું હતું.

બીજી તરફ કચ્‍છના નલિયામાં વહેલી સવારે ૧૮.૬ ડિગ્રી સાથે રાજ્‍યનું સૌથી ઓછું લઘુત્તમ તાપમાન નોંધાયું હતું. મહુવામાં ૧૮.૯, વડોદરામાં ૨૦.૧, ગાંધીનગરમાં ૨૦.૨, પોરબંદરમાં ૨૦.૪, રાજકોટમાં ૨૦.૬, અમરેલી અને કેશોદમાં ૨૦.૮ તથા અમદાવાદમાં ૨૨.૪ ડિગ્રી લઘુત્તમ તાપમાન નોંધાયું હતું.

નલિયામાં દિવસનું મહત્તમ તાપમાન ૩૮ ડિગ્રી અને લઘુત્તમ તાપમાન ૧૮.૬ ડિગ્રી રહેતાં બંને વચ્‍ચે ૧૯.૪ ડિગ્રીનો તફાવત જોવા મળ્‍યો હતો. રાજકોટમાં પણ દિવસ અને રાત્રિના તાપમાન વચ્‍ચે ૧૮.૭ ડિગ્રીનો તફાવત નોંધાયો હતો.

હવામાન વિભાગના અનુમાન પ્રમાણે આગામી ૪૮ કલાક દરમિયાન મહત્તમ તાપમાનમાં મોટો ફેરફાર થવાની શકયતા નથી. ત્‍યારબાદ તાપમાન ધીમે ધીમે ૨થી ૩ ડિગ્રી ઘટી શકે છે. જોકે આગામી સાત દિવસ સુધી લઘુત્તમ તાપમાનમાં ખાસ ફેરફાર થવાની સંભાવના નથી.

મહત્ત્વની બાબત એ છે કે આજે ૨૮ ઓક્‍ટોબરની સત્તાવાર ચેતવણી અનુસાર ગુજરાત તથા સૌરાષ્‍ટ્ર-કચ્‍છ માટે આગામી સાત દિવસ દરમિયાન ભારે વરસાદ કે તોફાનની કોઈ વિશેષ હવામાન ચેતવણી જાહેર કરવામાં આવી નથી. માવઠાની આગાહી માત્ર પસંદગીના જિલ્લાઓમાં છૂટાછવાયા હળવા વરસાદ માટે છે.