કડી : મહેસાણા જિલ્લાના કડી તાલુકાના થોળ ગામેથી એક અત્યંત હૃદયદ્રાવક અને ચોંકાવનારા સમાચાર સામે આવ્યા છે, જ્યાં ગત શનિવારથી રહસ્યમય સંજોગોમાં ગુમ થયેલી ૫ વર્ષીય માસૂમ બાળકી પાયલનું શંકાસ્પદ મોત નીપજ્યું છે અને ઘર નજીકથી માત્ર એક કિલોમીટર દૂર આવેલા એક ખેતરમાંથી બાળકીના માત્ર હાડપિંજર અને અવશેષો મળી આવતા સમગ્ર વિસ્તારમાં ભારે ચકચાર મચી ગઈ છે.

ઘટનાની વિગતો મુજબ, ગુમ થયા બાદ બાળકીના કપડાં અને અન્ય ચીજવસ્તુઓ મળી આવી હતી, જેના આધારે પરિવારે તેની ઓળખ કરી હતી અને દીકરીના આવા કરૂણ અંજામથી પરિવાર પર ભારે આભ ફાટી પડ્યું છે. પ્રાથમિક તપાસ અને રિપોર્ટ અનુસાર, કોઈ જંગલી પ્રાણી અથવા વિશાળ અજગર માસૂમ બાળકીને શિકાર બનાવી ગયો હોવાની પ્રબળ શંકા વ્યક્ત કરવામાં આવી રહી છે, જ્યારે અજગરના પેટમાં થતી એસિડિક પ્રક્રિયા બાદ માત્ર હાડકાં જ બહાર આવ્યા હોવાની ચર્ચાએ સ્થાનિકોમાં ડરનો માહોલ પેદા કર્યો છે.

આ ગંભીર મામલે પોલીસે તાત્કાલિક કાર્યવાહી કરીને મળેલા કંકાલનું અમદાવાદ સિવિલ હોસ્પિટલમાં ફોરેન્સિક પદ્ધતિથી સઘન પોસ્ટમોર્ટમ કરાવ્યું છે, પરંતુ હજુ સુધી એફ.એસ.એલ. અને ડી.એન.એ. રિપોર્ટ આવવાના બાકી છે.

પોલીસ અને વહીવટી તંત્ર દ્વારા આ બાળકીના રહસ્યમય મોત પાછળના સાચા કારણો શોધવા માટે ઊંડાણપૂર્વક તપાસ હાથ ધરવામાં આવી છે અને આગામી સમયમાં રિપોર્ટ આવ્યા બાદ આગળની કાનૂની કાર્યવાહી સ્પષ્ટ કરવામાં આવશે.