ગાંધીનગર : ગુજરાતના આરોગ્ય મંત્રી પ્રફુલ પાનશેરિયાએ ભારતની જાહેર આરોગ્ય પ્રણાલીની સરખામણી પશ્ચિમી દેશો સાથે કરતા એક મહત્વનું નિવેદન આપ્યું છે. ગાંધીનગરની જીએમઈઆરએસ (GMERS) મેડિકલ કોલેજ અને સિવિલ હોસ્પિટલ ખાતે આયોજિત ‘આંતરરાષ્ટ્રીય નર્સ દિવસ’ના કાર્યક્રમમાં તેમણે જણાવ્યું હતું કે, કેનેડા અને અમેરિકા જેવા વિકસિત દેશોમાં અત્યાધુનિક ટેકનોલોજી હોવા છતાં દર્દીઓને સારવાર માટે લાંબા સમય સુધી રાહ જોવી પડે છે, જ્યારે ગુજરાતમાં ૧૦૮ એમ્બ્યુલન્સ અને સરકારી હોસ્પિટલો દ્વારા ગંભીર કેસોમાં અત્યંત ઝડપી પ્રતિસાદ આપવામાં આવે છે.
 
નર્સિંગ એ માત્ર નોકરી નહીં, ‘નિષ્કામ કર્મયોગ’ છે
આધુનિક નર્સિંગના સ્થાપક ફ્લોરેન્સ નાઇટિંગેલની જન્મજયંતિ નિમિત્તે યોજાયેલા આ કાર્યક્રમમાં મંત્રીએ નર્સિંગ વ્યવસાયના નૈતિક મૂલ્યો પર ભાર મૂક્યો હતો. તેમણે કહ્યું કે, નર્સિંગ માત્ર ટેકનિકલ કુશળતાનું નામ નથી, પરંતુ દર્દીઓ સાથેનું કરુણાપૂર્ણ વર્તન અને સંવાદ એ તેની સાચી ઓળખ છે. દર્દી જ્યારે શારીરિક અને ભાવનાત્મક રીતે નબળો હોય, ત્યારે નર્સિંગ સ્ટાફ તરફથી મળતી હૂંફ અને માનવ સંવેદનશીલતા તેની અડધી બીમારી દૂર કરી દે છે.
 
કોવિડ કાળના સેવા યજ્ઞની યાદ તાજી કરી
કોરોના મહામારીના ભયાનક દિવસોને યાદ કરતા પાનશેરિયાએ ઉમેર્યું કે, જ્યારે વિશ્વના શક્તિશાળી દેશોની આરોગ્ય વ્યવસ્થાઓ પડી ભાંગી હતી, ત્યારે ગુજરાતના નર્સિંગ સ્ટાફે રાત-દિવસ જોયા વગર પોતાની ફરજ બજાવી હતી. પડકારજનક પરિસ્થિતિઓમાં પણ આ સ્ટાફે ‘નિષ્કામ કર્મયોગ’નું ઉત્તમ ઉદાહરણ પૂરું પાડ્યું હતું, જેના કારણે હજારો પરિવારોના માળા વિખેરાતા બચ્યા હતા.
 
માનસિક સ્વાસ્થ્ય અને બદલાતી જીવનશૈલી
વર્તમાન સમયમાં વધતા જતા માનસિક તણાવ અને ડિપ્રેશન અંગે ચિંતા વ્યક્ત કરતા મંત્રીએ જણાવ્યું કે, આજની જીવનશૈલીમાં માત્ર દવાઓ જ પૂરતી નથી. માનસિક પડકારોનો સામનો કરવા માટે દર્દીને ભાવનાત્મક સ્થિરતા અને નર્સિંગ સ્ટાફના સંવેદનશીલ અભિગમની ખૂબ જરૂર છે.
આ અવસરે નર્સિંગ સપ્તાહ દરમિયાન યોજાયેલી વિવિધ રમતગમત સ્પર્ધાઓના વિજેતા વિદ્યાર્થીઓને સન્માનિત કરવામાં આવ્યા હતા. નર્સિંગ વિદ્યાર્થીઓએ સુંદર સાંસ્કૃતિક કાર્યક્રમો રજૂ કર્યા હતા અને અંતમાં તમામ સહભાગીઓએ પૂરી નિષ્ઠાથી માનવતાની સેવા કરવાના શપથ લીધા હતા. આ પ્રસંગે વરિષ્ઠ આરોગ્ય અધિકારીઓ અને મોટી સંખ્યામાં નર્સિંગ સ્ટાફ ઉપસ્થિત રહ્યો હતો.