જગવિખ્યાત યાત્રાધામ અંબાજીમાં વિજયાદશમી નિમિત્તે શસ્ત્ર અને શમી પૂજનની પરંપરાગત ઉજવણી કરવામાં આવી હતી. અંબાજી મંદિરની પાછળ આવેલા ઐતિહાસિક માનસરોવર કુંડ ખાતે શમીના વૃક્ષ નીચે ઢોલ-શરણાઈના સૂર વચ્ચે ધાર્મિક વિધિઓ યોજાઈ હતી. આ પ્રસંગે મંદિરના વહીવટી સ્ટાફ, ભટ્ટજી મહારાજ, મુખ્ય પૂજારીઓ, દેવસ્થાન ટ્રસ્ટના અધિકારીઓ અને એસઆરપીના જવાનો હાજર રહ્યા હતા. શાસ્ત્રોક્ત વિધિથી સુરક્ષા શસ્ત્રોનું પૂજન, આરતી અને પ્રસાદ વિતરણ કરવામાં આવ્યું હતું.

આ ઉપરાંત અંબાજી પોલીસ સ્ટેશન ખાતે પણ PI પારગી સહિતના પોલીસ અધિકારીઓ અને કર્મચારીઓએ કાયદો-વ્યવસ્થા જાળવવા માટે ઉપયોગમાં લેવાતાં શસ્ત્રોનું વિધિવત પૂજન કર્યું હતું. આમ, ગુજરાતભરમાં રાવણ દહનથી લઈને શમી અને શસ્ત્ર પૂજન સુધી વિવિધ ધાર્મિક પરંપરાઓ સાથે વિજયાદશમીની ઉજવણી કરવામાં આવી હતી.