અમદાવાદ :રાજ્ય સરકારના નવા ગુજરાત ભાડા વિધેયક-2026ના વિરોધમાં અમદાવાદની વિવિધ કોર્ટોના વકીલોએ ત્રણ દિવસીય હડતાળનું એલાન કર્યું છે. 30 સપ્ટેમ્બરથી 2 ઓક્ટોબર સુધી વકીલો કોર્ટના નિયમિત કામકાજથી અળગા રહેશે. ભદ્ર સ્થિત સિટી સિવિલ એન્ડ સેશન્સ કોર્ટ, સ્મોલ કૉઝ કોર્ટ, ફેમિલી કોર્ટ અને અમદાવાદ ગ્રામ્ય કોર્ટ સહિતની કોર્ટોના વકીલો આ વિરોધમાં જોડાયા છે.

હડતાળ દરમિયાન ભદ્ર સ્થિત સિટી સિવિલ એન્ડ સેશન્સ કોર્ટ, સ્મોલ કૉઝ કોર્ટ, ફેમિલી કોર્ટ તેમજ અમદાવાદ ગ્રામ્ય કોર્ટના વકીલો ન્યાયિક કામગીરીથી દૂર રહેશે. આ ઉપરાંત ઘીકાંટા સ્થિત મેટ્રો કોર્ટ તેમજ જિલ્લા અને તાલુકા સ્તરે પણ વિરોધ કાર્યક્રમો અંગે ચર્ચા ચાલી રહી છે.

વકીલ મંડળોએ સંબંધિત કોર્ટોને વિનંતી કરી છે કે હડતાળના દિવસોમાં વકીલો અથવા પક્ષકારોની ગેરહાજરીને કારણે એકતરફી કાર્યવાહી ન કરવામાં આવે તેમજ કોઈ વોરંટ કે નોટિસ જારી ન કરવામાં આવે.

વકીલોના જણાવ્યા અનુસાર, નવા ગુજરાત ભાડા વિધેયક-2026માં ભાડા સંબંધિત કેસોમાં સિવિલ કોર્ટની સત્તા ઘટાડીને કેટલાક અધિકારો વહીવટી અધિકારીઓને આપવાની જોગવાઈ કરવામાં આવી છે. તેમના મતે, આ ફેરફારથી ભાડૂત અને મકાનમાલિક વચ્ચેના વિવાદોના ન્યાયિક નિરાકરણની પ્રક્રિયામાં મુશ્કેલી ઊભી થઈ શકે છે.

વકીલોનો એવો પણ દાવો છે કે વહીવટી અધિકારીઓ સમક્ષ કેસ જવાથી નાગરિકોને ન્યાય મેળવવામાં વિલંબ અને વધારાની હાડમારીનો સામનો કરવો પડી શકે છે. આ મુદ્દે વકીલ મંડળોમાં અસંતોષ જોવા મળી રહ્યો છે.