અમદાવાદ : ગુજરાતમાંથી નૈઋત્યના ચોમાસાની વિદાયની પ્રક્રિયા હવે સત્તાવાર રીતે શરૂ થઈ ચૂકી છે. છેલ્લા કેટલાક દિવસોથી રાજ્યના મોટાભાગના વિસ્તારોમાં વરસાદે વિરામ લીધો છે, જેના પરિણામે વાતાવરણમાં પલટો આવ્યો છે અને તાપમાનનો પારો ઉપર ચડ્યો છે. રાજ્યમાં ગરમીનું પ્રમાણ વધતા લોકોએ ફરી એકવાર ઉનાળા જેવો અહેસાસ કરવાનો શરૂ કર્યો છે. હવામાન વિભાગના જણાવ્યા અનુસાર, આગામી દિવસોમાં હવામાન કેવું રહેશે અને કયા શહેરમાં કેટલું તાપમાન નોંધાયું છે તેની વિગતવાર માહિતી સામે આવી છે.

રાજ્યના વિવિધ શહેરોમાં તાપમાનની સ્થિતિ અને આગામી આગાહી

આજે રાજ્યના મોટાભાગના શહેરોમાં મહત્તમ તાપમાન ૩૫ થી ૩૬ ડિગ્રી સેલ્સિયસની આસપાસ નોંધાયું છે. આજના આંકડાઓ પર નજર કરીએ તો, રાજકોટમાં સૌથી વધુ ૩૫.૫ ડિગ્રી મહત્તમ તાપમાન નોંધાયું છે, જ્યારે કેશોદમાં સૌથી ઓછું ૨૧.૭ ડિગ્રી લઘુત્તમ તાપમાન નોંધાયું છે. અમદાવાદમાં મહત્તમ તાપમાન ૩૪.૮ ડિગ્રી અને લઘુત્તમ તાપમાન ૨૪.૯ ડિગ્રી આસપાસ રહ્યું છે.

હવામાન વિભાગની આગાહી મુજબ, આગામી ૩૦ સપ્ટેમ્બર અને ૧ ઓક્ટોબરના રોજ દક્ષિણ ગુજરાતના સુરત, તાપી, ડાંગ, નવસારી, વલસાડ તેમજ સૌરાષ્ટ્રના અમરેલી, ભાવનગર, રાજકોટ, જામનગર અને જૂનાગઢ જેવા જિલ્લાઓમાં છૂટાછવાયા સ્થળોએ હળવાથી મધ્યમ વરસાદી ઝાપટાં પડી શકે છે. જોકે, આગામી ૨ ઓક્ટોબરથી ૬ ઓક્ટોબર દરમિયાન સમગ્ર રાજ્યમાં વાતાવરણ સામાન્ય રીતે સૂકું રહેવાની સંભાવના છે અને આગામી ૭ દિવસ સુધી હવામાન વિભાગ દ્વારા કોઈ મોટી ચેતવણી આપવામાં આવી નથી.