સુરત:સુરત જિલ્લાના માંડવી તાલુકાના વીરપુર ગામે રાત્રિના સમયે અચાનક દીપડાના આંટાફેરા જોવા મળતા સમગ્ર પંથકમાં ભયનો માહોલ છવાઈ ગયો છે. શિકારની શોધમાં રહેણાંક વિસ્તારમાં આવી પહોંચેલા આ વન્યજીવની સમગ્ર ગતિવિધિ સ્થાનિક સીસીટીવી કેમેરામાં સ્પષ્ટપણે કેદ થઈ છે, જેના પગલે ગ્રામજનો અને પશુપાલકોમાં ભારે ચિંતા જોવા મળી રહી છે.

સુરતના જંગલ અને ગ્રામીણ વિસ્તારોમાં દીપડાઓની વધતી જતી વસ્તીને કારણે અવારનવાર આવા બનાવો સામે આવતા હોય છે. અગાઉ પણ અરેઠ પંથકના વીરપુર ગામે દીપડાની દસ્તક જોવા મળી હતી, અને હવે ફરીથી રાત્રીના સુમારે દીપડો ઘુસી આવતા રહીશોમાં ફફડાટ વ્યાપી ગયો છે. દીપડાની આ સતત અવરજવરના કારણે લોકોએ રાત્રે ઘરની બહાર નીકળવાનું પણ ટાળવું શરૂ કરી દીધું છે.

સદનસીબે અત્યાર સુધી દીપડા દ્વારા કોઈ પણ માનવ કે પશુ પર હુમલો કરવામાં આવ્યો નથી અને કોઈ જાનહાની નોંધાઈ નથી, પરંતુ દીપડાના સતત વધતા ખૌફથી ગ્રામજનો ભયના સાયા હેઠળ જીવી રહ્યા છે. ઘટનાની ગંભીરતાને ધ્યાનમાં રાખીને સ્થાનિક લોકો દ્વારા ત્વરિત ધોરણે વન વિભાગને જાણ કરવામાં આવી છે, જેથી વન વિભાગની ટીમે સીસીટીવી ફૂટેજના આધારે તપાસનો ધમધમાટ શરૂ કર્યો છે.

ગામમાં સુરક્ષા વધારવા અને દીપડાના જોખમમાંથી મુક્તિ મેળવવા માટે વન વિભાગ દ્વારા તાત્કાલિક અસરથી યોગ્ય સ્થળોએ પાંજરા ગોઠવવાની અને પેટ્રોલિંગ વધારવાની તજવીજ હાથ ધરવામાં આવી છે. આગામી સમયમાં વન વિભાગ દ્વારા આ ખૂંખાર વન્યજીવને સુરક્ષિત રીતે પકડીને અન્યત્ર ખસેડવા માટે વિશેષ ઓપરેશન ચલાવવામાં આવશે તેવી ખાતરી આપવામાં આવી છે.