<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 17th November 2026

15 કરોડનો બિઝનેસ અને વૈભવી જીવન ત્યાગી સુરતનો કરોડપતિ પરિવાર બનશે સંયમી : ભયાનક અકસ્માત બાદ બદલાયો જીવનનો દ્રષ્ટિકોણ : આખી જિંદગી બદલી નાખી

સુરતના ટેક્સટાઈલ વેપારી દિલીપભાઈ ભોગર (47), પત્ની જ્યોતિબેન (45) અને બે દીકરીઓ છવિ (22) અને ચાર્વી (14) 8 ફેબ્રુઆરી 2027ના રોજ સુરતના પાલમાં લેશે જૈન દીક્ષા, મોટી દીકરી શૈલી 2023માં જ બની ચૂકી છે સાધ્વી દર્શિતા,

સુરત તા.૧૭ : કરોડો રૂપિયાનો કારોબાર, સુખ-સુવિધાઓથી ભરેલી જિંદગી અને સમાજમાં સ્થાપિત ઓળખ... સામાન્ય રીતે લોકો આવી જિંદગીને વધુ સારી બનાવવાના સપના જુએ છે, પણ ગુજરાતના સુરતમાં રહેતા દિલીપભાઈ ભોગર અને તેમના પરિવારે તેનાથી બિલકુલ અલગ રસ્તો પસંદ કર્યો છે.

મૂળ રાજસ્થાનના ઉદયપુર જિલ્લાના ગોગુંદા વિસ્તારના જસવંતગઢ ગામના વતની દિલીપભાઈએ 12મા ધોરણ સુધી અભ્યાસ કર્યો. ત્યારબાદ સારા ભવિષ્યની શોધમાં સુરત પહોંચ્યા અને એક નાની દુકાનથી કાપડનો વેપાર શરૂ કર્યો. ધીમે ધીમે મહેનત અને લગનથી સુરતના ટેક્સટાઈલ માર્કેટમાં તેમની ઓળખ બની. ત્રણ દુકાનો અને આધુનિક મશીનો સાથે તેમનો વાર્ષિક ટર્નઓવર લગભગ 15 કરોડ રૂપિયા સુધી પહોંચી ગયો.

પત્ની જ્યોતિબેને જણાવ્યું કે, થોડા સમય પહેલા દિલીપભાઈનો ખૂબ જ ભયાનક રોડ અકસ્માત થયો હતો. તે અકસ્માતમાં તેમનો જીવ બચવો અત્યંત મુશ્કેલ હતો. પણ ગુરુ અને ઈશ્વરની કૃપાથી તેઓ સંપૂર્ણ સ્વસ્થ થઈને ઘરે પરત ફર્યા.

આ એક જ ઘટનાએ આખા પરિવારની વિચારસરણી બદલી નાખી. તેમને અહેસાસ થયો કે આ સાંસારિક જીવન અસ્થાયી છે. ધન-દોલત, વૈભવ બધું અહીં જ રહી જવાનું છે. આચાર્યશ્રીના સંપર્કમાં આવ્યા બાદ તેમનો ઝુકાવ ધર્મ અને આધ્યાત્મ તરફ વધ્યો. વૈરાગ્યનો ભાવ જાગતા તેમણે વેપાર વધારવાને બદલે તેને સમેટવાનું શરૂ કર્યું, જેમાં પત્ની અને દીકરીઓએ પણ પૂરો સાથ આપ્યો.

આ પરિવારમાં વૈરાગ્યની શરૂઆત 2023માં જ થઈ ગઈ હતી. તેમની એક દીકરી શૈલીએ સાંસારિક જીવન છોડીને જૈન સાધ્વી બનવાનો નિર્ણય કર્યો. દીક્ષા લીધા બાદ તેમણે સાધ્વી દર્શિતા નામ ધારણ કર્યું. બહેનના આ પગલાએ આખા પરિવારને પ્રેરણા આપી.

બંને દીકરીઓ પાસે કરિયર બનાવવા અને જિંદગી જીવવાના ઉત્તમ અવસર હતા. મોટી દીકરી છવિએ ગ્રાફિક ડિઝાઈનિંગનું ભણતર પૂરું કર્યું હતું અને ક્રોશિયા આર્ટથી પોતાનું સારું કામ શરૂ કર્યું હતું. પણ ધર્મની લગન લાગતા તેણે પોતાનું કામ બંધ કરી દીધું.

સૌથી નાની દીકરી ચાર્વી ફૂટબોલ ખેલાડી રહી છે અને સુરતમાં જિલ્લા સ્તર સુધી મેચ રમી છે. તેણે 9મા ધોરણનું ભણતર વચ્ચે જ છોડીને આધ્યાત્મની રાહ પસંદ કરી.

હવે દિલીપભાઈ (47), પત્ની જ્યોતિબેન (45), મોટી દીકરી છવિ (22) અને નાની દીકરી ચાર્વી (14) એક સાથે *8 ફેબ્રુઆરી 2027ના રોજ સુરતના પાલ વિસ્તારમાં* જૈન દીક્ષા લઈને સંયમ માર્ગ અપનાવશે. દીક્ષા સમારોહ પહેલા આખો પરિવાર પોતાના વતન જસવંતગઢ પહોંચ્યો છે.

વેપાર જગતથી લઈને સામાજિક વર્તુળોમાં આ પરિવારના નિર્ણયે લોકોને વિચારતા કરી દીધા છે - કે ખરો સુખ વૈભવમાં છે કે વૈરાગ્યમાં?

(4:45 PM IST)