સુરત : ગણેશોત્સવ દરમિયાન દેશભરમાં એકથી એક ચડિયાતા ગણપતિ પંડાલો અને ભવ્ય પ્રતિમાઓ જોવા મળે છે, પરંતુ સુરતમાં કળા અને ભક્તિનો એક અનોખો સંગમ જોવા મળ્યો છે. સુરતના જહાંગીરાબાદ વિસ્તારમાં આવેલા સુમન વાણી બિલ્ડિંગમાં રહેતા યુવાન પટેલ મયંક દિનેશભાઈએ પેન્સિલની અણી (ટોચ) પર ગણેશજીની અતિસૂક્ષ્મ મૂર્તિ કોતરીને સૌ કોઈને મંત્રમુગ્ધ કરી દીધા છે. આ મૂર્તિનું કદ માત્ર ૬ મિલીમીટર (6mm) છે, જે સુરત શહેરની સૌથી નાની ગણેશ પ્રતિમા હોવાનું માનવામાં આવે છે.

આ અદ્ભુત કલાકૃતિ પાછળનો વિચાર મયંકને આશરે બે વર્ષ પહેલાં આવ્યો હતો. તેણે સૌથી પહેલાં પ્રયોગ તરીકે પેન્સિલની અણી પર પોતાના નામનો પ્રથમ અક્ષર 'M' કોતર્યો હતો. આ પ્રયોગ સફળ રહેતાં તેના મનમાં વિચાર આવ્યો કે જો અક્ષર કોતરી શકાતો હોય તો શું વિઘ્નહર્તા ગણેશજીની પ્રતિમા પણ આટલી નાની જગ્યામાં કંડારી શકાય? આ વિચારને સાકાર કરવા માટે તેણે પ્રયાસ શરૂ કર્યા અને આખરે સફળતા મેળવી.

જોકે, માત્ર ૬mmની જગ્યા પર મૂર્તિ કંડારવી એ અતિ કઠિન અને પડકારજનક કાર્ય હતું. મયંકે આ મૂર્તિ પૂર્ણ કરવા માટે સતત પાંચ દિવસ સુધી ભારે મહેનત કરી હતી. આટલી ઝીણી કોતરણી દરમિયાન હાથની સહેજ પણ હિલચાલ આખી મૂર્તિને નુકસાન પહોંચાડી શકે તેમ હોવાથી તેણે અદ્ભુત ધીરજ અને એકાગ્રતા જાળવી રાખી હતી. ખાસ વાત એ છે કે મયંક આ કળાને માત્ર પ્રદર્શન પૂરતી સીમિત નહીં રાખતાં, શાસ્ત્રોક્ત પૂજા-અર્ચના પૂર્ણ કર્યા બાદ આ આખી પેન્સિલનું જ ભક્તિભાવપૂર્વક વિસર્જન કરવાનો નિર્ધાર કર્યો છે.