સુરત : સુરત રાંદેર પોલીસે મોટી સફળતા મેળવતા 9 વર્ષથી નાસતી-ફરતી મહિલા ઠગને ઝડપી પાડી છે. કરોડો રૂપિયાની છેતરપિંડી આચરી ફરાર થયેલી આરોપી મહિલાને મુંબઈના થાણેથી ઝડપી લેવામાં આવી છે.

 

શું હતો સમગ્ર મામલો?

 

 

પકડાયેલી આરોપીનું નામ વિનાયા ગોસર છે. તે ઓસમ કંપનીની મહિલા ડિરેક્ટર હતી. વિનાયા અને તેના સાગરીતોએ સુરતમાં લોકોને ઊંચા વળતરની લાલચ આપી રોકાણ કરાવ્યું હતું. રોકાણકારો પાસેથી કરોડો રૂપિયાનું ફંડ એકત્ર કર્યા બાદ જ્યારે સ્કીમની પાકતી મુદત આવી, ત્યારે કંપનીએ રાતોરાત તમામ શાખાઓ બંધ કરી દીધી હતી.

 

ગ્રાહકોને વ્યાજ કે મુદ્દલ ચૂકવવાના બદલે કંપની બજારમાંથી ઉઠમણું કરી ગઈ હતી. પોતાની મહેનતની કમાણી ડૂબી જતા સેંકડો રોકાણકારોના પગ નીચેથી જમીન સરકી ગઈ હતી.

 

2021માં નોંધાયો હતો ગુનો

 

છેતરપિંડીનો ભોગ બનેલા સ્થાનિક પરિવારોએ ભેગા મળીને વર્ષ 2021માં સુરત સીઆઈડી ક્રાઈમ પોલીસ સ્ટેશનમાં કંપની વિરુદ્ધ સત્તાવાર ગુનો દાખલ કરાવ્યો હતો. ગુનો નોંધાતા જ કંપનીની મુખ્ય સૂત્રધાર વિનાયા ગોસર અંડરગ્રાઉન્ડ થઈ ગઈ હતી અને સતત 9 વર્ષથી પોલીસને ચકમો આપતી હતી.

 

 

રાંદેર પોલીસે કેવી રીતે પકડી?

 

 

રાંદેર પોલીસને બાતમી મળી હતી કે આરોપી મહિલા મુંબઈના થાણે વિસ્તારમાં નામ બદલીને રહે છે. ટેકનિકલ સર્વેલન્સ અને હ્યુમન ઇન્ટેલિજન્સના આધારે વોચ ગોઠવી રાંદેર પોલીસની ટીમે મુંબઈ પહોંચી આરોપીને દબોચી લીધી હતી.

આરોપીને સુરત લાવી રાંદેર પોલીસ સ્ટેશનમાં કાયદેસરની કાર્યવાહી હાથ ધરવામાં આવી છે. પોલીસે આરોપીના અન્ય સાગરીતો અને ઠગાઈના નાણાંનું શું થયું તે દિશામાં વધુ તપાસ શરૂ કરી છે.

ફોટોમાં રાંદેર પોલીસ સ્ટેશનના અધિકારીઓ સાથે પકડાયેલી આરોપી મહિલા નજરે પડે છે. સુરત પોલીસ દ્વારા છેલ્લા કેટલાક સમયથી ફરાર આરોપીઓને પકડવા માટે ‘ઓપરેશન રેઈનબો’ જેવી ઝુંબેશ ચલાવવામાં આવી રહી છે.